Сайт использует сервис веб-аналитики Яндекс Метрика с помощью технологии «cookie». Пользуясь сайтом, вы даете согласие на использование данной технологии.
Өкен Таңсыхан! Ешқандай айғай-атансыз, ақтылы-қаралы пиярсыз халықтың көңілінен орын алған өнер иелері болады. Өйткені, олар шын таланты тудырған риясыз өнерін халыққа таза ниетімен арнауды ғана ниет етеді. Ондай кіршіксіз өнерді халық та жатырқаусыз, ықыласты көңілімен қабылдайды, өнерпазын көңіл төрінде сақтайды. Міне, сондай өнер иесінің бірі Өкен Таңсыхан. Шыңжаң бетіндегі екі-үш буынның Өкен ағамыздың өр дауысты әні мен құйқылжыта сайрататын гитара үніне елітпегені жоқ. Жастар арасында Өкенше ән айту, Өкенше гитара шерту сәнге айналған.Ол өзінен кейінгі буынды әніне ұйыта білді, еліктетті, гитара сазына қосылған қазақ әніне ғашық етті. Артық айтқан емес, Шыңжаң бетіндегі қазақтың Дос Мұхасаны да, Виктор Цойы да, Табылды Досымовы да өзі бола білді. Ол кісі табиғи талант еді, гитараны да, әнді де өз бетімен үйреніп, биік деңгейге жетті. Өкен Таңсыхан жай ғана өнер иесі емес, ұлтын сүйген, сөзін сөйлеп, жоғын жоқтаған қайраткер де. Қытай билеген елде намысын жықпаған, қазғына жүрегін берген, қытайдың жуан жұдырығы сілтенген тұстарда қарап қалмаған азамат. Қазір ағамыз қазақ еліне оралды. "Шетте жүрді" дерміз, бірақ сол жатқағы қара ормандай көп қазақты өнермен баулып, рухын жанып, қаншама жасты қазақ әнімен тербеді, жалпы қазақ өнеріне, мәдениетіне үлес қосты. Өйткені, жер бетіндегі қазақ - бір қазақ. Оның тілі, ділі, мәдениеті, өнері бөлінбейді. Сондықтан, осындай ағаларымызды елге келгенде елеп-ескеріп, жалпы қазақ мәдениетіне, өнеріне сіңірген еңбегіне жоғарыдан аз да болса көңіл бөлінсе, құрмет жасалса деп ойлайсың. Ол енді мәдениет саласын басқарып отырған лауазымды аға-әпкелеріміздің еншісінде... Төменде ағамыздың бір әнін ұсынайын, дайындықсыз, баптаусыз, жай ғана шығып айта салған әні. Көптің көңілін жықпайтын өнер иесінің шынайы көңілі, орындауы деп түсініңіздер. Шымкентте орындалған ән.
