Атырауда егеуқұйрықтар қаптады

Атырауда егеуқұйрықтар қаптады. Қоқыс арасында ғана жүретін кеміргіштер кәріз құбырлары арқылы көпқабатты тұрғын үйлерге де кіре бастаған. Пәтер ішінде өріп жүрген атжалмандар адамнан да қорықпайды. Сондықтан үрейі ұшқан жұрт дабыл қағып, шенеуніктерден көмек сұрайды. Олар улау жұмыстарын жүргізбесе инфекция тарап, балаларға қауіп төнуі мүмкін деп отыр. Алайда шенеуніктердің айтар өз уәжі бар. Толығырақ әріптесім Жұлдыз Тілеухан айтып берсін. Баспана ішінде емін-еркін жүрген егеуқұйрықтарды алғаш көрген тұрғындар абдырып қалған. Күз басталғалы кеміргіштердің күрт көбейгені көпшілікті алаңдатып отыр. Тықыр еткен дыбыс шықса жұрттың зәресі ұшады. Түн ұйқымыз төрт бөлінді деген қараша кілем, жиһазымыз бүлінді деп ашулы. Нұрсая ықшамауданының халқы өз күшімен улау жұмыстарын жүргізген. Бірақ одан нәтиже болмай тұр. Сондықтан олар шенеуніктерден көмек сұрайды. ГҮЛНАР ҚҰЛПЕЙІСОВА, Атырау қаласының тұрғыны: Улау жұмыстарын жүргізу керек. Дұрыс ұйықтаудан қалдық. Жертөле былай тұрсын үйдің ішінде жүр. Дизенфекцияға қаражат бөлсін. Бұлай болмайды. Санитарлық-эпидемиологиялық бақылау департаменті тұрғындардан шағым қарша борағанын жасырмайды. Алайда кеңес айтудан басқа қолдан келер шара жоқ дейді. АЙГҮЛ ЫСҚАҚОВА, Атырау облысы санитарлық-эпидемиологиялық бақылау департаменті басшысының орынбасары: Бұл кеміргіштер әр түрлі ауруларды таратуы мүмкін. Оның ішінде оба, истериоз жұқпалы аурулардың түрі көп. Ішек аурулары да тарауы мүмкін. Тұрғындар тарапынан және коммуналдық шаруалық тарапынан шаралар атқарылуы керек. Тұрғындар дәлізге қоқыс тастамауы керек. Өз айналасындағы тесіктерді, саңылауларды бітеуі керек. Бетон алаңдары қоршалуы керек. Шенеуніктер кеміргіштердің көзін жоюға қазынадан қаражат бөлінбейді деп кесіп айтты. Тұрғын үй заңнамасына сәйкес улау жұмыстарына ПИК қызметкерлері жауапты деп бар жұмысты соларға сілтеді. ҒАСЫРБЕК ТӨЛЕГЕН, Атырау қаласы әкімдігінің баспасөз хатшысы: Көпқабатты тұрғын үйлердің жертөлелері бар, кіреберіс, подъездері бар, солардың барлығы көпқабатты тұрғын үйлердің тұрғындарының жеке мүлкі болып есептеледі. Оларды дизенфекциялау, тазарту жұмыстары, дератизациялау жұмыстары, кеміргіш жәндіктерге қарсы улау жұмыстарының барлығын пәтер иелері кооперативтерімен бірлесіп, атқарылуы тиіс. Атқамінерлер адам көп жүретін демалыс орындарында ғана барлық зиянкестерге дезинфекция жұмыстары жүргізілетінін жеткізді. Сондықтан тұрғындарды үй ішінде тазалықты сақтауға шақырады. #Информбюро #31арна #БастыЖаңалықтар #атырау #егеуқұйрық #крысы