VIDEO
Матлуба Юсуф Охун (Матлуба Юсупова) 1967-йил 16-апрелда Андижон вилояти Пахтаобод тумани Уйғур қишлоғида туғилган. 1984-1989 йиллар Тошкент Давлат Университетида таҳсил олган. 2020-йилдан Ўзбекистон Ёзувчилар уюшмаси аъзоси. Дастлабки меҳнат фаолиятини Пахтаобод тумани Ёшлар Иттифоқида (собиқ комсомол комитети)да бошлаган. 1990-1993 йилларда Пахтаобод тумани “Давр садоси” газетасида мухбир, туман радиосида муҳаррир бўлиб ишлаган. 1993-йилдан Андижон вилояти телевидение ва радиоэшиттириш қўмитасида радио бўлими муҳаррири, 1995-йилда телевидение бўлими муҳаррири, 1999-йилда вилоят телерадиокомпанияси қошидаги “Равнақ” студияси бўлим бошлиғи, 2000-2021 йил сентябрь ойигача телерадиокомпания телевидение гуруҳи мухбири, махсус мухбири, катта муҳаррири лавозимларида ишлаган. Ҳозирда Муҳаммад Юсуф номидаги ижод мактабининг ижодкор ўқувчиларига журналистика йўналишида машғулотлар олиб борилмоқда. 2012 унинг илк китоби “Оқ рўмол” ҳикоя ва қиссадан иборат тўплами нашр этилган. Бундан ташқари “Пахтаобод дурлари” тўпламида ҳам ҳикоялари чоп этилган. “Бобур изидан”, “Буюклар изидан”,“Буюк соҳибқирон изидан”, “Унутма, руҳим шод эт” номли туркум ҳужжатли видеофильмлар муаллифи. Матлуба Юсупованинг меҳнат ва ижодий фаолияти муносиб баҳоланган. “Ўзбекистон мустақиллигининг 20 йиллигига” кўкрак нишони (2011), “Маънавият фидойиси” кўкрак нишони (2020) билан тақдирланган. 2016-йил “Олтин қалам” миллий мукофотига сазовор бўлган.
