Саха ыта уонна Саха норуотун дьылҕата

Саха булчут ыттарын үөскэтээччи Айаал Данилов Саха ытын уонна Саха норуотун дьылҕаларын, генофондаларын туһунан быһааран, ырытан кэпсиир. Айаал Данилов өссө итиннэ ситэрэн этэр: бастакы үөрэхтээх дьоммут, Саха «элиталара» үгүстэрэ нуучча, атын да омук дьахталларын ойох ылбыттара. Тоҕо диэтэхххэ, Саха дьахтара кинилэргэ сайдыыларынан тэҥнэспэттэр этэ, тоҕо диэтэр хойут үөрэхтэммиттэрэ. Онон ол бастыҥ дьоннорбут оҕолоро Саха буолбакка, ити курдук, атын омуктуун холбоһон уонна репрессиялананнар сүтэн, симэлийэн хаалбыттара. Ити билигин чаҕылхайдык көстөр буолла. Урукку курдук бас-көс, сыты-хотуу, кимтэн да, туохтан да толлубат, норуоту барытын түмэр, батыһыннарар киһи суох. Былыр-былыргыттан итинник баар. Холобур, монголлар орто үйэҕэ күүскэ утарсыбыт норуоту бас бэриннэрдэҕинэ бас-көс, чулуу дьонун (элитатын) барытын уол оҕолорунуун баҕастыын кырган кээһэллэрэ, кыргыттарын ойох ылаллара. Оччоҕо ол норуот тостон хаалан, үөрбэ сүөһү курдук, киһи этэринэн эрэ сылдьар дьон буолан хаалар эбит.