ОТГОНЫ ДОРЖ /Архангай аймгийн Хайрхан сумын харьяат Хөдөлмөрийн баатар, Гавьяат малчин./

Закадр: Монгол улсын хөдөлмөрийн баатар, гавьяат малчин Отгоны Дорж нь Архангай аймгийн Цэцэрлэг сумын нэгдүгээр багийн нутагт “Онгоцот” хэмээх газарт төрж, Отгоны тав дах хүүхэд болж мэндэлсэн. Бага насандаа эцэг эхийн гар дээр мал маллан өсөж өнгөрүүлсэн бөгөөд 1957 оноос хойш сумын бага сургууль, аймгийн 10 жилийн дунд сургуульд суралцаж улмаар Улаанбаатар хотын санхүү, эдийн засгийн техникумд элсэн орж, нягтлан бодогч мэргэжлээр сурч төгссөн. Закадр: Отгоны Дорж нь ажлын анхны гараагаа Улаанбаатар Төмөр замын харьяа суудлын вагон депод нягтлан бодогчоор эхэлж, 1972 онд Монголын энх тайван найрамдлын байгууллагын гүйцэтгэх хороонд нягтлан бодогч, үйлчилгээ аж ахуйн хэлтсийн дарга, зохион байгуулагч, “Монгол-Зөвлөлтийн найрамдлын нийгэмлэг”-ийн төв зөвлөлд Санхүү аж ахуйн дарга зэрэг албыг хашиж, ур чадвар, сэтгэл зүрхээрээ хамт олноо манлайлан үлгэрлэсэн. 1988 оноос хойш гэргий Х. Гэрэлхүүгийн хамтаар хөдөө аж ахуйн үйлдвэрлэл эрхэлж, ардын аж ахуйтан болсон юм. Тэрээр бага залуу насандаа унтах нойр идэх хоолоо хасаж, хөдөлмөрлөн бүтээвэл сайн сайхан амьдрах нь дамжиггүй хэмээн хуучилж, чин шударгаар хөдөлмөрлөхийг амьдралын гол зарчим болгож ард олон, төр түмэндээ хөдөлмөрийн үнэ цэн, малчин байхын сайн сайхныг үлгэрлэн харуулж яваа эрхэм билээ.