Шымкенттегі инфекциялық аурухананың науқастары суық еденде жатып ем қабылдап жүр

Шымкенттегі инфекциялық аурухананың науқастары суық еденде жатып ем қабылдап жүр. Өйткені емделуші көп, орын жоқ. Амалы жоқ ел дәліздің бір бұрышына тығылып отырып, екпесін салдыртырып, дәрігерге көрінеді. Адам төзгісіз бұл жағдай, әсіресе баласын бауырына басқан аналарға қиын болып тұр. Бейнежазбадан ана мен баланың суық дәлізде жатқанын байқауға болады. Ауруханаға ем іздеп келген әйелге ақ халаттылар палатада орын жоқ деген. Ұлының денсаулығына алаңдаған ана шарасыздықтан емдеу мекемесінде қалған екен. Бірақ тұрғын, үлкен шаһарда ауруханадан бір палата табылмағанына қынжылады. Ал Денсаулық сақтау басқармасының өкілдері науқастардың күрт көбейгенін және орын тапшылығы туындағанын жасырмайды. Сөздеріне сенсек, қалада эпидахуал ушығып, емделушілер саны өскен. Мұндай жағдайға медициналық мекеме дайын болмай шыққан. Бірақ ақ халаттылар желіге таралған жазбадан кейін науқастар палатаға орналастырылды деп есеп берді. ШЫМКЕНТ ҚАЛАСЫ ДЕНСАУЛЫҚ САҚТАУ БАСҚАРМАСЫНЫҢ БАСПАСӨЗ ҚЫЗМЕТІ: Қысқа мерзім ішінде қажетті ұйымдастырушылық шаралар қабылданды. Барлық науқастар санитариялық нормалар мен талаптарға сәйкес палаталарға орналастырылды. Қазіргі уақытта жағдай толық тұрақтандырылды. Медициналық көмек көрсету қалыпты режимде жүзеге асырылуда. #Информбюро #31арна #БастыЖаңалықтар #Новости #31канал