Әлия Молдағұлованың 90 жылдық мерейтойы Қобда ауданында өтті

ҚР Премьер-министрінің орынбасары Бердібек Сапарбаев пен облыс әкімі Архимед Мұхамбетов бастаған топ Әлия ауылында алдымен ескерткішке гүл шоқтарын қойды. Мұнда ауыл тұрғындары, қоғамдық бірлестік, патриоттық клубтың өкілдері, жастар көп жиналған. Қаз-қатар тізілген топ ерлікке тағзым етіп, қазақтың батыр қызын еске алды. Кейін саябақ жанындағы мәдениет үйін аралап көрді. 130 орынды ғимаратта мәдени шаралар, танымдық кештер жиі өткізіледі. Мұнда кітапхана да бар. Сонымен қатар Әлия патриоттық орталығы келушілерді тағы бір таң қалдырды. Мұндағы бай мұражай, кең де жайлы орын, спорт зал өскелең ұрпаққа мол тәлім береді. Халықпен кездескен вице-премьер Бердібек Сапарбаев мерейтоймен құттықтап, халықтың ахуалын сұрады.Жергілікті халықтың тілегін тыңдаған Бердібек Сапарбаев "бала туу көрсеткіші артып, халық саны көбейсе балабақша салу қиын жұмыс емес" деп жауап қайырды. Сондай-ақ бүгін Қобда ауданының орталығында Алтынай Жорабаева, Асылбек Еңсепов, Ринат Гайсин, Құдайберген Айтпаев және тағы да басқа эстрада жұлдыздарының қатысуымен үлкен мерекелік концерт өтті. Әлия Молдағұлованың туған жерінде өткен мерейтой ертеңгі "Тұжырым" тақырыбының арқауы. Біз онда кәсіпорындар мен аудандар тіккен этноауыл, ұлттық ойындар мен бәйге жайын толық баяндаймыз.