Елімізде тағы бір сарбаз табытпен оралды

Елімізде тағы бір сарбаз табытпен оралды. Бір апта бұрын ғана Шекара қызметіне отан алдындағы борышын өтеуге кеткен Нұрасыл Әнуар жедел жәрдем қызметінің көлігінде көз жұмды. Ұлттық қауіпсіздік комитетінің өкілдері бастапқыда болжам бойынша жас жауынгердің өліміне миының қабынуы себеп деген еді. Бірақ кейін сараптама нәтижесінде басқа диагноз қойылды. Бұл қара жамылған отбасының күдігін одан сайын күшейтіп отыр. Олар сап-сау кеткен ұлдарының ауырып ажал құшқанына сенбейді. Нұрасыл Әнуарды туыстары бір апта бұрын ғана Қызылорда вокзалынан әскерге шығарып салған еді. Отан алдындағы борышымды өтеймін деп өзі құлшынған жігіт жақындарымен қимай-қимай қоштасады. Бірақ бұл соңғы жүздесу болатынын ешкім білмеген еді. Бейбіт күнде үйіне табытпен оралған сарбаздың өлімі бүтін бір әулеттің қабырғасын қайыстырды. Әкесі ұлымен қаралы хабарға дейін бір күн бұрын телефон арқылы тілдескенде денсаулығына шағым айтпады деп отыр. Сондықтан марқұмның жақындары барлық медициналық тексеруден өтіп, әскерге сап-сау аттанған жас жігіттің ауырып көз жұмды дегенге сенбейді. ӘНУАР ҚЫДЫРӘЛИЕВ, марқұмның әкесі: Кеше военкоматтан келгендер бәрі айтты. Балаңызды танимын, бәрі денсаулығы жақсы деді. Енді мынау ғой енді, денсаулығы жақсы адам бір күнде менингит болып өліп қалады деген қайдағы бір нелерді қойып жатыр. Анау камераны көрейік, құлаған жерін десе, көрсетпеді. Жасырып отыр. Енді 9-да түн емес, камера қосылып тұр ғой. Қара жамылған отбасы Нұрасылдың соңғы демі шығар сәтте не болғанын өз көздерімен көргісі келеді. Оның үстіне әскери бөлімдегілер мәйітті өздерінен бірнеше сағат бойы жасырғаны көңілдеріне күдік ұялатқан. АЙНҰР ТЕМІРБЕК, марқұмның әпкесі: Баланы көруге барады. Бірақ мәйітті криминалистер алып кетті деп айтады. Моргке барса, моргте де жоқ. Тағы бір жаққа кетті дейді. Таңғы 8-ден кешкі 4-ке дейін ұстайды ғой баланы көрсеткісі келмей. Ал ұлттық қауіпсіздік комитетінің өкілдері күні кеше ғана жас жауынгердің өліміне мидың қабынуы себеп деп болжам жасаған. Бірақ бүгін сараптамадан соң тыныс алу жолдарына инфекция түскені белгілі болды деп отыр. СЕРІК ТӨЛЕУХАНОВ, Алматы облысы бойынша шекара қызметі департаменті басшысының орынбасары: Ешқандай жарақат алу немесе ұрған-соққан жарақаттар анықталмаған. Бүгінгі сараптамада қойылған алдын ала диагнозы тыныс алу жолдарының инфекциясы. Сол жөнінде қазір тергеу тағайындалды. Қызметтік тексеру жүргізіліп жатыр. Небәрі 18 жасында қайтыс болған кенже ұлымның арманы көп еді дейді әкесі. Нұрасыл Әнуар мақсатын қағазға тізіп жазып кеткен. Хаттан сарбаздың әкесіне көлік алып беру, жаңа телефон алу, үйді жөндеу сияқты жоспарлары болыпты. Бірақ оның бірін де орындай алмай бақиға аттанды. Айта кетейік, қыршыннан қиылған сарбаздың анасы да осыдан 4 жыл бұрын көз жұмған екен. #Информбюро #31арна #БастыЖаңалықтар #Новости #31канал