Жеңістер мен жеңілістен тұратын, Тірлік-күрес. Жеткізе ме мұратың. Сол тірлікте керек екен бір адам Жүрегіңді жақынырақ ұғатын. Кездеріңде қиял аттан құлаған, Кездеріңде қиянаттан жылаған Жұрт аяйды. Бірақ сенің жаныңда, Қалмайды ешкім. Қалатыны бір адам. Сол адамның жақын болар аты тым, Бөліседі ол жақсылығын, уақытын. Сол адаммен жеңілірек жүгің де, Сол адамға байланысты бақытың. Болсын сенде дос ондаған, жүз мейлі, Болсын бәрі мейірімді, ізгі ойлы. Бір-ақ адам сеніменен бақытты, Бір-ақ адам сені аңсайды, іздейді. Тәңірінен тірлігіңді сұраған, Бар болса егер сол аяулы бір адам. Қолын созып кездеріңде құлаған Арашалар жаза менен күнәдан. Сені ешқашан шығармас ол санадан Қасіреттен,қайғы, мұңнан, наладан. Жауыздықтан, жамандықтан, жаладан, Құтқармайды одан басқа жан адам. Тастамайды ол төпесе де ақпан қар, Сол адаммен арайлырақ ақ таңдар Ондай адам жоқ болса егер, іздеңдер, Ал бар болса, аялаңдар, сақтаңдар. Жалғыз болсаң, жаның қалай жалындар, Махаббатың барда – мәңгі әнің бар. Сүйгендерің болса, адасып қалмаңдар Сүйгендерің болмаса, іздеп, табыңдар!
