VIDEO
Сайн байцгаана уу 🤓 Удаан уулзсангүй дээ, Мөн ч их хүлээсэн дээ та нартаа видео үзүүлэх гэж... Энэ удаад "Зохиогчийн эрх болон түүнд хамаарах эрхийг зөрчих гэмт хэрэг"-ийн талаар ярихын тулд саяхан өрнөсөн нэгэн олон нийтийн хэлэлцүүлгийн сэдвийг авчирлаа. Энэ бол найруулагч О.Бат-Өлзий, зохиолч Д.Норов-ийн "Зүрхэнд шивнэсэн үг" МУСК билээ. Тус гэмт хэргийн нэршил нь 2006 оны Зохиогчийн эрх болон түүнд хамаарах эрхийн тухай хуулиас үүдэлтэй бөгөөд энэ хууль 2021 онд шинэчлэн найруулагдан Зохиогчийн эрхийн тухай хууль болон өөрчлөгдсөн. Тус гэмт хэргийн агуулгаар хамтдаа "Үүсмэл бүтээл" ба зохиогчийн зөвшөөрөл, зөвшөөрөлгүй авахгүй байж болох тохиолдлуудад хамаарах Fair use буюу шударга хэрэглээг ярилцана. Бид өдөр тутамдаа хэн нэгний зохиосон бүтээл, оюуны өмчийг үргэлж хуулбарлаж, хөрвүүлж, орчуулж, эмхтгэж, өөрчлөх болсон. Бараг л бүх хүн оюуны өмчид өдөр бүр халддаг хэдий ч яагаад бүгд зөрчил, гэмт хэрэг болдоггүй вэ гэдэг талаар ярих юм. Та өдөр бүр бусдын оюуны бүтээлд халддаг хэрнээ хэнээс ч зөвшөөрөл авдаггүй, бас авах ч шаардлагагүй байдаг шалтгаан бол нийгмийн шаардлага болох шударга хэрэглээ юм. Хүн үргэлж соён гэгээрч, нийгэмшиж, иргэншиж байх учиртай оюунлаг биет билээ. Жич: Видеондоо яагаад "Зүрхэнд шивнэсэн үг" МУСК хэн ч хаанаас ч үзэх боломжтой байгаа нь өөрөө хууль бусаар хуулбарлагдсан гэдэг агуулгаар яригдаагүйд тайлбар тавилгүй орхигдуулчихжээ. Энэ нь өөрөө өргөн нэвтрүүлгийн буюу өргөн дэлгэцээр олон нийтэд түгээгдсэн болон арилжааны шинж чанар арилсан, соён гэгээрэл гээд маш том хэлэлцүүлгийн асуудал байдаг. Шаардлагатай бол дахин видео хийж тайлбарлана аа. Надад "хаанаас ч үзэх боломжтой байгаа нь өөрөө зөрчил байхгүй юу" гэж битгий хэлээрэй сануулсан шүү хаххах. Тус киноны зохиогчийн эрх продакшнд нь байсан уу, найруулагчид нь байсан уу, бүр улсын өмч үү гэдэг дээр тайлбар нэмэх байсан ч бас л мартчихжээ. Ерөнхийдөө Монголд найруулагчийн нэр дээр оюуны өмчийн гэрчилгээ гарч, зохиогчийн эрх эзэмшигчээр бүртгэгдсэн байгаа тохиолдолд бүтээлийн үүсмэл бүтээл болгон ашиглуулах онцгой эрхийг найруулагчаас нь авна.
