«РСК Банк» ААКсы Мамлекеттик ипотекалык компания менен биргеликте өлкө Президентинин демилгеси менен «Топтолмо ипотекасы» уникалдуу социалдык долбоорун иштеп чыгууда. Программа мамлекеттик турак жайды каржылоонун жеткиликтүүлүгүн жогорулатууга, өлкөдө жашаган жана чет өлкөдө иштеген жарандарды турак жай менен камсыздоого багытталган. Топтолмо ипотекасынын негизги артыкчылыктары болуп эң ыңгайлуу пайыздык чендер жана насыя алуунун жөнөкөйлөштүрүлгөн тартиби саналат. Бул программанын негизги шарты баштапкы төлөмдү топтоо болуп саналат - мүлктүн наркынын 30%. Жаран аларды графикке ылайык ай сайын (6 айдан кем эмес) толуктап, банкта топтойт. Андан кийин банк ага күрөөсүз турак жайдын баасынын 20% өлчөмүндө 5 жылга жылдык 10% менен насыя берет. Карыз алуучу калган 50%ды 8% менен Мамлекеттик ипотекалык компаниясынан 15 жылга алат. Топтолмо ипотека долбоорун расмий ишке киргизүү 2024-жылдын күз айларына пландаштырылган. Уникалдуу социалдык ипотекалык долбоордун ишке киришине байланыштуу, ошондой эле Кыргызстан үчүн банктын заманбап ролун жана киргизилип жаткан инновацияларды, экономиканы жана бүтүндөй өлкөнү өнүктүрүүгө кошкон зор салымын эске алуу менен, финансылык мекеменин атын өзгөртүү жөнүндө чечим кабыл алынган. Банк жарандарга жана элге, чындап эле, дагы жакын болуп калды. Жаңы аталыш катары “Элдик Банк” тандалды. Белгилей кетсек, бул Банктын трансформация иштеринин башталышы гана!
