“Лигачев Абдуллаевага Ўзбекистон раҳбари лавозимини ваъда қилган”

Публицист Шароф Убайдуллаев билан OzodNazar эшиттириши доирасида ўтказганимиз Наврўз суҳбатларининг 2- қисмида суҳбатдошимиз собиқ Ўзкомпартиянинг идеология масалалари бўйича секретари Раъно Абдуллаева билан ғойибона баҳсга киришади. Яқинда ёши 80 га тўлган Раъно Абдуллаева куни кеча Озодлик саволларига жавоб бераркан, ўтган асрнинг 80- йиллари ўрталарида Ўзкомпартия Марказий қўмитасида Наврўзнинг “ҳаёт-мамоти” масаласи кўрилган мажлисни эслар экан, “Наврўзнинг тақиқланишига менинг алоқам йўқ, чунки мен ўша мажлисдан олдин ишдан бўшаган эдим”, деди. Раъно Абдуллаеванинг бу гапини Шароф Убайдуллаев рад этди. “Гапларимни исботлаш учун етарли ҳужжатларим бор”, деди.