«Директордан көрген қорлық». Ақтөбе облысында мұғалімдер шу көтерді

Ақтөбе облысы Кеңқияқ ауылындағы мектептің мұғалімдері директордан көрген қорлығымыз көп деп шу шығарды. Шыр-пыр болған педагогтар жаңа басшы келгелі ұжымнан береке кетті деп отыр. Айтуларынша, ұстаздарды жұмысқа конкурссыз қабылдап, білгенін істейді. Ол аздай, қарсы шықсақ жұмыстан босатып, қудалайды деп ашынады. Аядай ғана мектептегі заң бұзушылықтарды жіпке тізіп берген мұғалімдердің жанайқайын өңірдегі әріптесім тыңдап келді. Ұстаздар жанайқайын жеткізу үшін екі жүз шақырымды артқа тастап, облыс орталығына арнайы келді. Мектептің жаңа директорынан мазамыз қашты дейді мұғалімдер. Қарсы шықсаң күн көрсетпей, жазаның түр-түрін қолданады. Айтқанына көнбесең жұмыстан шығарудан да тайынбайды деп отыр. ХАНЫМ АХМЕТЖАНОВА, Кеңқияқ орта мектебінің бұрынғы мұғалімі: Мектеп директорымыз біздерге қысым жасау арқылы сол кісіден жазаның түр-түрін алып жатырмын. Және қысымның түрін көріп жатырмын. Мен оған шындықты айтып, үнемі қарсы шығатындықтан ол кісі мен жолынан алып тастағысы келіп, қазіргі таңда ең ауыр тигізіп тұрғаны 21 қазаннан бастап мені жұмысымнан босатып тастады. Бірақ ешқандай түсініктеме де берілмейді. Сөгіс те берілмейді. Басшы ескі кадрларды тазалап, таныстарын конкурссыз жұмысқа қабылдайды дейді шағымданушылар. Осы бассыздықтарды жіпке тізіп, білім басқармасына айтып бердік. Бірақ еш шара қолданылмады деп күйінеді. ЖАНАРГҮЛ БЕГІМБЕТОВА, Кеңқияқ орта мектебінің мұғалімі: Биыл конкурссыз математика пәнінің мұғалімі алынып жатыр. Одан қалды биылғы жұмысқа алынған мамандардың бәрін де тексеруді талап етемін. Себебі оның біреуінде педагогикалық текстен өткен қағазы бар ма жоқ па. Ол күмән туып тұр. Былтыр да бір-екі мұғалім кірді. Олардың да педагогикалық тестен құжаттары бар ма, жоқ па күмән тудырады. Басы дауға қалған директордың өзі қарамағындағы қызметкерлердің сөзін жоққа шығарды. Айтуынша, бір ғана ұстаз еңбек кодексіне сәйкес жұмыстан шығарылған. АЙНАШ БРИШОВА, Кеңқияқ жалпы білім беретін орта мектебінің директоры: Аталған педагог мектептің ішкі тәртіп ережесін бірнеше рет бұзу фактісі орын алды. Осыған байланысты тәртіптік шара қолданылды. Және еңбек кодексіне сәйкес жұмыстан босатылды. Ал облыстық білім басқармасы мектептегі жағдайдан хабардар. Тіпті, ұжыммен кездесу өткізген. Және тексеріс жұмыстарын да бастапты. НҰРГҮЛ БЕРТІЛЕУОВА, Ақтөбе облыстық білім басқармасы басшысының орынбасары: Жалпы басқа да жағдайлардың мән-жайын анықтау мақсатында облыстық білім басқармасы жанынан зерделеу тобы құрылды. Кешенді түрде зерделеу жүргізіледі. Сол зерделеудің қорытындысымен ғана нақты шешім қабылданады. Шенеуніктердің жауабына қанағаттанбаған ұстаздар енді министрліктен араша сұрамақ. #мұғалім #31арна #БастыЖаңалықтар #Кеңқияқ #Ақтөбеоблысы #актобе #Ұстаз