Гүлжамал Есқабылқызын еске алу бейнефильмі

Әркімнің құдайы - өз әкесі мен анасы дегенді әрбір саналы ұрпақ жоққа шығармайды. Біз үшін де өмірдегі ең қымбат жандар - ата-анамыз. Өйткені, олардың орнын ешкім де толтыра алмайды. Қашанда адам баласына болсын деп отыратын абзал жүректі анамыз бен кең пейілді әкеміз үлкенді ерекше сыйлай білетін, мәдениетті жандар болатын. Олардың балаларына, ағайын, тума- туысқанға ,құда- құдағайларына деген көңілі бөлек еді... Ойлайсың! Ойға қаласың! Осынау жарық дүние қас қағым сәт екенін еске аласың! Өткіншілігін ойлағанда көкірегің қарс айрылады. Өйткені, бізге сая болған, осы күнге жеткізген қос бәйтерегіміз бүгін жоқ. Асқар тау әкеміздің өмірден өткеніне 5 жыл болса, ал аяулы анамыздың бақиға бет түзегенінен бері де 1 жыл өте шығыпты. Ардақты анамыз, ақжаулықты әжеміз Гүлжамал Есқабылқызының ортамызда жарқырап жүргені күні кеше ғана еді. Енді ол жайында тек өткен шақтармен естеліктер айтамыз, жанға бататыны сол. Асыл анамыз ұлтжанды, кісілігі мол, ұлттық тәрбиеден тамыры ажырамаған парасатты жан еді. Қарашаңырақтың құт-берекесі, жүрегі мейірімге толы анамыз отбасылық мерекелердің, талай думандардың бастауы болып, шаңырақты шаттыққа толтырып жүретін. Өзіңіз бар да көңіл шат, жас баладай алаңсыз өмір өткізгендей едік. Сіз біздің деміміз, тынысымыздай едіңіз. Мына жарық әлемде жоқ екеніңізді білген сайын жанымыз жабырқай түседі...