Шу аудандық мәдениет үйінде Жамбыл облысы әкімдігінің қолдауымен, Облыстық ардагерлер кеңесінің ұйымдастыруымен ұлттық салт-дәстүр мен батаның тәрбиелік мәнін насихаттау мақсатында ұйымдастырылып отырған ұлағаты мол, ауызының дуасы бар, батагөй қариялардың «Батаменен ел көгерер» атты батагөйлердің облыстық байқауы өз мәресіне жетті. Айтулы байқауды облыстық ардагерлер кеңесінің төрағасы Еркінбек Солтыбаев және Шу аудан әкімі Бақытжан Жәнібеков құттықтау сөзбен ашып, Шу ауданының айтыскер ақыны Ғабит Есдаулетов халыққа арнауын жолдады. Бата- рухани қазына! Қазақ руханиятында адал ниет, ізгі тілек білдірудегі ұлттық дәстүр саналатын батаның алар орны ерекше! Бұл байқауға өңіріміздің 11 аймағында өткен іріктеу сайыстарында жүлделі орындарға ие болған 11 үміткер қатысты. Халқымызда «Атаңнан бата-балаға мәңгі құт» дегендей байқауды бастау алдында Жамбыл облыстық билер алқасының төрағасы Оңласын Есіркеповтің ақ батасымен ашты. Ал, байқаудың қазылар алқасына Ш.Мұртаза атындағы Халықаралық Тараз иновациялық институтының вице-президенті, педагогика ғылымының докторы, профессор Махметқали Сарыбеков төағалық етті. Қазылар алқасының мүшелері ақын Ахметжан Қосақов, Орынбай Рысбаев, Ержан Өмірәлиев, Ахметжан Өзбеков сынды азаматтар сайланды. Бата сайысында батагөй қариялар «Ұлттық салт-дәстүр бойынша», «Ел есіндегі белгілі тұлғалардың батасы», «Салт-дәстүр бойынша» жүргізілді. Бірінші кезеңнің қорытындысы бойынша сегіз қатысушыға түрлі номинациялар бойынша бағалы сыйлықтар мен Алғыс хаттар тапсырылды. Бұл байқауда жүзден жүйірік атанған батагөй қариялар да өз деңгейінде құрметке бөленіп, жеңімпаз бен жүлдегерлерге аудан әкімінің атынан ақшалай сыйлықтар мен арнайы Дипломдар табысталды. Атап айтсақ: 1 - ші орынды Тараздық Әбілов Құдайберді Аблашұлы, 2 – ші орынды Байзақтық Халық Аманғазы, 3 – ші орынды Жамбылдық Ерболат Қуандықов қанжығалады.
