Жаңа ереже! Енді алаяқтар қоңырау шалған телефон нөмірлері бірден бұғатталатын болады

Елімізде алаяқтар қоңырау шалған телефон нөмірлері бірден бұғатталады. Жасанды интеллект және цифрлық даму министрлігі киберқауіпсіздікті күшейту мақсатында жаңа ереже бекітті. Жаңашылдыққа сәйкес күмән тудырған байланыс нөмірлері екі күн бойы арнайы жүйеде тексеріледі. Жауапты ведомство өкілдері айлакерлерді анықтау үшін сим-картаны уақытша өшіру керек деп отыр. Сондықтан қазақстандықтарды түсіністікпен қарауға шақырады. Келесі апта күшіне енетін жаңа ереже туралы әріптесім Абай Нұржанұлы толығырақ айтып берсін. Жаңа ережеге сәйкес байланыс операторлары алаяқтардың қоңырауы мен хабарламасын бақылап отырады. Егер күдік туса бірден нөмір иесі туралы деректер Ұлттық банктің антифрод жүйесіне жіберіліп, екі күн бойы егжей-тегжейлі тексеріледі. Осы уақыт аралығында азаматтар ұялы телефон нөмірін қолдана алмайды, яғни уақытша бұғатталады. ОЛЖАС ҚАБЕНОВ, ҚР Жасанды интеллект және цифрлық даму министрлігі комитет төрағасының орынбасары: Ұлттық банкке қарасты антифрод жүйесіне құқық қорғау органдары, екінші деңгейлі банктер және ұялы байланыс операторлары қосылған. Соған сәйкес Ұлттық банк сараптама жасайды. Яғни нөмір арқылы алаяқтық әрекетке барғаны расталса, ақпаратты қайта операторға жолдайды. Операторлар нөмірді бұғаттайды. Әрі қарай құзырлы органдар жұмыс істейді Жасанды интеллект және цифрлық даму министрлігі бекіткен бұйрықта бұдан бөлек те өзгерістер бар. Мәселен бір адам енді 10-нан артық Сим-карта пайдала алмайды. Сондай-ақ алғаш рет “биометриялық деректер” ұғымы енгізілмек. Яғни нөмірді пайдаланушылардың бет-әлпетін сәйкестендіретін ортақ база жұмыс істейді. Одан бөлек операторлар тұрғындардың байланыс сапасына қатысты ұсыныстары мен шағымдары тәулік бойы қабылдауға міндетті. Ал жаңа ереже 18-қарашадан бастап күшіне енеді. АБАЙ НҰРЖАНҰЛЫ, тілші: Айта кетейік, елімізде шілде айынан бері IMEI-код арқылы сәйкестендіруден өтпеген жаңа телефондарды бұғаттау жұмыстары жүріп жатыр. Бұл байланыс құралдары арқылы келетін қауіптің алдын алуға арналған. Қазірге дейін 200 мыңнан аса ІМЕІ-код жарамсыз болып, телефондар қара тізімге енгізілді дейді жауапты ведомство өкілдері. #Информбюро #31арна #БастыЖаңалықтар #Новости #31канал