Боранды күні үйінен шығып кеткен Ойыл ауданының 36 жастағы тұрғыны әлі табылған жоқ

Боранды күндері Мұғалжар ауданының 3 шопаны адасып кеткен. Қойдың соңынан ере шыққан олар ұсақ малды түгендеймін деп өздері бір тәулік бойы далада қалды. Ал Ойыл ауданы орталығынан 2-ші қаңтар күні шығып кеткен 36 жастағы ауыл тұрғыны әлі іздестіріліп жатыр. Іздеу жұмыстарына 7 техника мен 40-тан астам адам жұмылдырылды. Бұл Ақтөбе мен Хромтау тас жолындағы қар құрсауында қалып қойған жүк көліктерінің алғашқы легі. Көз аштырмас боран кезінде тас жолдан шығып кеткен жүк көліктері көп болды. Ұзынсонар тізбекті облыс әкімі Бердібек Сапарбаев та көрді. Жолды ашу, көліктердің қозғалысын қалпына келтіру жұмыстарын өзі бақылады. Көліктерімен қарға омбылағандардың көбі жергілікті тұрғандар. 2-ші қаңтарда төтенше жағдайлар қызметі облыс аумағында "барлық тас жол жабық" деген хабарлама таратты. Бірақ мұны ешкім елемегенге ұқсайды. Желдің жылдамдығы секундына 20-25 метрге дейін жетті. Өңір басшысы күртік қарға қамалғандарды сабырға шақырып, жұмысынан қалып қойған адамдарға анықтама қағазын беруді облыстық Төтенше жағдайлар департаментінің бастысына тапсырды. Жолынан қалғандардың 400-ге жуығы өзбек азаматы. Олар Хромтау, Ақтөбе қаласындағы арнайы жасақталған құтқару орындарына жеткізілді. Ыстық тамақ, жатын орынмен қамтылды. Қаңтар басталғалы облыста 200-ден астам адам құтқарылып, 600-ден астамы қауіпсіз жерге шығарылды. Боран күні жолға шығып, далалықта қалып қойған жолашауларды құтқаруға арнайы қызмет техникасынан бөлек, ірі өндіріс орындарының жүк көліктері де жұмылдырылған.