Оқушыны зорлап, аяусыз өлтірген С.Наумцев өмір бойына бас бостандығынан айырылды

Ақтөбелік оқушы Гүлдира Сәкенованы зорлап, оны аяусыз өлтірді деп айыпталған Сергей Наумцев өмір бойына бас бостандығынан айырылды. Ал оған көмектескен Виктория Савич өмірінің 25 жылын түрмеде өткізетін болды. Ғаламтор арқылы танысқан Гүлдираны үйлеріне шақырып алып, ойларына келгенді істеген екеуге алқа билер соты осындай шешім шығарды. Сот төрешісі үкімді оқып жатқан кезде Сергей Наумцев кінәсін мойындамайтынын білдіріп, мойнын шайқаумен болды. Ал Виктория Савичтің жүзінен өкінген сыңайды аңғару қиын емес еді. Бір-бірінен алшақта тұрған екеудің тіл табысуы да мүмкін болмады. Он төрт жастағы Гүлдира Сәкенованың өліміне жарты жылға жуық уақыт өтсе де, Ақтөбе тұрғындары аяусыз жасалған қылмысты ұмыта қоймапты. Өткен жылдың қазанында қытайдың ала сөмкесіне салынған қыздың киімсіз денесі қаладағы үйлердің бірінің кіреберісінен табылған еді. Тәртіп сақшылары күдікті деген қос ғашықты араға санаулы күн салып тапқан. Қолдарын қанға бояғандар букмекерлік кеңсенің 21 жастағы қызметкері Виктория Савич пен 22 жастағы бағдарламашы Сергей Наумцев болып шыққан. Күдікті бойжеткеннің түсініктемесі тәртіп сақшыларын ғана емес, жұрттың да жағасын ұстатқан еді. Савич Гүлдирамен әлеуметтік желі арқылы танысады. Кездейсоқ таныстық емес, көздеген мақсатына жету үшін. Наумцев Викторияға "Егер сыйлыққа "пәк" қыз тауып бермесең, қатынасымыз үзіледі " деп қорқытқан соң, сүйіктісінен айырылып қалмау үшін оқушыны үйіне шақырады. Тергеу нұсқасы бойынша, жігіт Гүлдираны зорлаған. Ал таң ата ғашығын жеткіншектен қызғанған қыз, Сәкенованы ұялы телефонның сымымен және жастықпен тұншықтырады. Ал Сергей бұл кезде Гүлдираны аяғынан ұстап тұрған. ТАЛҒАТ ҚҰЛТАЗИН, Гүлдира Сәкенованың ағасы: Қылмыскерлер кінәларын мойындамай отыр.