"Үй алма, көрші ал", - дейді көреген қазақ... Балпық би ауылының тұрғыны Сағымбек Қарғабаев тыныштығын ұдайы бұзатын көршісімен қырғи қабақ. Іргелес азамат ауласынан ауыл жүк көліктерін жөндейтін орталық ашқан еді. О баста, бірді- екілі көлік кіріп-шығып жатқанда елең қылмағансыды. Соңғы уақытта көліктер көбейген. Ертелі-кеш гүрілдеген техникадан бала-шағасының мазасы қашыпты. Әрі, көк түтіннен де зәрезап болған сыңайлы. Ең бастысы, ауыр техникадан жер жүйелі дірілдеп, үйінің іргетасына зиян келіп жатқанын айтып шағымданды.
