ЖАҚСЫНЫҢ АТЫ ӨЛМЕЙДІ... Екінші дүниежүзілік соғыс. Ел тарихында елеулі орын алған сол бір кезең әлі есімізде. Бала жетім, әйел жесір, ерттеулі ат ерсіз қалған сонау сұрапыл соғыс жылдарын ұмытуға хақымыз да жоқ шығар. Оңғар Орманов соғыс майданына аттанып, мүгедек болып оралды. Дегенмен атпал азамат тағдыр тауқыметіне қажымас қайратымен қарсы тұрып, туған жерде өскелең ұрпақтың кемелденген азамат болуы үшін ұзақ жыл ұзтаздық етті. Бүгін саналы ғұмырын ағарту саласына арнаған майдангердің тұлғасы көпке үлгі. Піскент ауданының Ақтөбе ауылында Оңғар Ормановтың жадына арнап ескерткіш қойылған. Үй мұражайы, кітапхана, мешіт, футбол алаңы да батыр бабаның қасқайып тұрған бейнесінің айналасына құрылып, өмірден өткен батыр бабаның мәңгілік жадын айғақтайды. Оңғар Ормановтың өмір жолы көпке үлгі. Соғыс майданындағы ерліктерінен бастап, қиын-қыстау кезеңдердегі ерен еңбегін ел құрметпен еске алады. Өйткені оның жас ұрпаққа берген саналы тәрбиесі мен сапалы білімінен басқа ауылдың ынтымағын жарастырып, ауызбірлігін арттыруда адамгершілік қасиетімен қосқан үлесі аз емес. Жылда кейіпкеріміздің жадына арнап көптеген іс-шара өткізіледі. Солардың қатарында дәстүрге айналған 9 май – Еске алу және қастерлеу күніндегі футбол жарысы да бар. Биыл да әдеттегіден айнымай жас және ардагер футболшылар арасындағы футбол жарысы өтті. Бір ерекшелігі осы жолы Қазақстан Республикасының Шымкент қаласындағы “Биік” ардагерлер футбол клубының ойыншалары мен Ташкенттегі “Бунядкор” футбол клубының ардагер футболшыларының арасында жолдастық кездесуі. Бұдан көзделген басты мақсат – жастардың арасында салауатты өмір салтын насихаттау мен екі ел арасындағы достық қарым-қатынастарын спорт арқылы нығайту. – Оңғар ағай көптің адамы еді, – дейді “Ақтөбе” ауылының ақсақалы Еркін Өмірбеков. – Оңғар ағай көптің адамы еді. Оның халыққа, ауылға жасаған қызметі мол. Бізге әрқашан оқыңдар, білімді болыңдар, еңбек етіңдер деп айтып келді. Сол кісінің арқасында ауыл жастары өмірден өз орнын тауып, нағыз азамат болды. Төлеби Әлібекұлы айтқандай: “Атадан ұл туса игі, Ата жолын қуса игі...”. Оңғар Орманов екі ұл, төрт қыз тәрбиеледі. Үлкен ұлы Анарбек Орманов бүгінде елдің азаматы. Ол мелиорация саласының білгір маманы. Өз саласындағы барлық жаңалықтарды елдегі мелиорацияға елгізіп, осы саланың дамуына сүбелі үлесін қосуда. Биылғы еске алу турнирі өте жоғары деңгейде өтті. Екі ел арасындағы достық қатынастарын нығайтумен қатар, екі ұрпақ футболшылары арасында тәрбиелік мәні жоғары болған іс-шарада жеңіске жеткен спортшылар мен командалар диплом және бағалы сыйлықтармен марапатталды. Атам қазақ “Жақсының аты, ғалымның хаты өлмейді” деп бостан босқа айтпайды. Көненің көзіндей болып, Отан үшін отқа түсіп, соғыс майданында қан кешкен, одан кейінгі кезеңдерде еселі еңбек еткен ардагерлер жылдан жылға азайып бара жатыр. Сол батыр бабалардың бейнесі, олардың жасаған ерліктері жас ұрпақты саналы етіп тәрбиелеуде таптырмас қазына. Жер-жерлерде өткізілетін осындай еске алу және қастерлеудей игі шаралардан аларымыз мол. #дидар #анарналибаева #рустемтөленов
