Жиһаз жинап, қабырға сылады: Алматыда колледж студенттерінің республикалық сайысы өтті
Алматыда республикалық WorldSkills чемпионаты қорытындыланды. Колледж студенттері арасында өткізілетін дәстүрлі сайыс биыл елімізде 9-мәрте ұйымдастырылып отыр. Білім және ғылым министрлігінің бастамасымен іске асқан дода кәсіптік-техникалық бағытты қамтиды. Мақсат – жастар арасында білікті әрі тәжірибелі кадр даярлау. Көптің ішінен үздік шыққан студенттер ел намысын әлемдік деңгейде қорғайтын болады, деп хабарлайды Almaty.tv тілшісі. Бекзат Абзалбекұлы – Алматы техникалық колледжінде сылақшы мамандығында оқиды. Қалалық WorldSkills жобасына қатысып, үміткерлердің арасынан топ жарып шыққан. Бүгінде құрылыс қарқыны жақсы, сұраныс бар жерде ұсыныс та көп дейді студент. Оқу бітіргеннен кейін мамандығы бойынша жұмыссыз қалмайтынына сенімді. «Алматы қаласы бойынша аймақтық чемпионмын. Қазір енді республикалық жарысқа қатысып жатырмын. Қарсыластар өте жақсы дайындалып келген. Конструкцияға 9 сағат уақыт берілді. Оған үлгердім, содан кейін шпаклевка жағуға 4 сағат беріледі», – деді Worldskills Kazakhstan-2021 байқауының қатысушысы Бекзат Бақытбай. Биылғы республикалық байқауға еліміздің түкпір-түкпірінен 70-ке жуық үміткер қатысып жатыр. Олар кәсіптік-техникалық бағыттың төрт саласы бойынша сынға түсуде. Атап айтсақ, жиһаз жинау, дәнекерлеу, қабырға сылау жұмыстары және жылу құбырларын құрастыру. Үздік жұмысшыны анықтаудағы негізі талап – студенттердің өз ісіне деген ұқыптылығы мен жылдамдығы. Олардың еңбектерін тәуелсіз сарапшылардан құралған мамандар бағалайды. «Бұл жұмысшы мамандықтың мәртебесін көтеру мақсатында ұйымдастырылып отырған шара. Қатысушылардың бәрі де «сен тұр, мен атайын» деген әрі түрлі аймақтан келген мықтылар. Бәрі де өз біліктілігі мен өнерін көрсетті», – деді Алматы құрылыс-техникалық колледжінің директоры Бектұрған Ахметов. Республикалық байқаудың жеңімпаздары 10 желтоқсан күні белгілі болады. Нұр-Сұлтан қаласында салтанатты шарада марапатталады. Көптің ішінен үздік шыққандар Қазақстан намысын әлем деңгейінде қорғайды. Биылғы халықаралық дода Қытай Республикасының Шанхай қаласында өткізіледі деп жоспарланып отыр. Ұлағат Арғын, Мейрам Исабеков, «Алматы» телеарнасы Наш сайт - Телеканал Алматы в социальных сетях: 1 канал Youtube - / almatyus 2 канал Youtube - / almatytvnews Facebook RUS - / almaty.tv Facebook KAZ - / almaty.tv.kaz Twitter - / almaty_tv Instagram - / almaty.tv
