Сайт использует сервис веб-аналитики Яндекс Метрика с помощью технологии «cookie». Пользуясь сайтом, вы даете согласие на использование данной технологии.
⚖️ «Заң үстемдігі» YouTube арнасының қонағы – Астана қаласы татуластыру орталығының басшысы Әділханов Бекмұхаммед Бақытбекұлы. Бағдарлама барысында ол орталықтың қызметі мен көрсеткіштері туралы мәлімет беріп, татуластыру рәсімдерінің қоғамдағы орны мен маңызын атап өтті. Мысалы, 2024 жылы Астана қаласы сотының жанындағы татуластыру орталығы 19 384 материалды қарауға қабылдап, оның ішінде 9 462 іс тараптардың өзара келісімімен, сотқа дейінгі тәртіпте шешілген. Бұл – халықтың татуластыру рәсіміне деген сенімі артып келе жатқанын және соттан тыс реттеу механизмдерінің тиімді жұмыс істей бастағанын білдіреді. Даулардың басым бөлігін қаржы ұйымдары алдындағы берешек (5 244 іс), неке және отбасы даулары (4 055 іс), еңбек даулары және тұрғын үйге байланысты даулар құрайды. Сонымен қатар, орталық 206 азаматқа тегін заң көмегін көрсетіп, 420 адамға психологиялық қолдау ұйымдастырды. Бұл азаматтарға жан-жақты қолдау көрсетіліп жатқанын және татуластыру процесінің тек заңгерлік қана емес, психологиялық аспектілерге де назар аударатынын көрсетеді. Дауларды сотқа жеткізбей, ерікті түрде шешудің тиімділігі зор: тараптар уақыт пен қаражат үнемдейді, қарым-қатынастар сақталады, процесс құпиялықпен өтеді және бейбіт жолмен келісімге келу мүмкіндігі артады. Сонымен қатар, бұл әдіс сот жүктемесін азайтуға да ықпал етеді. Бекмұхаммед Бақытбекұлының айтуынша, татуластыру рәсімі қазіргі құқықтық саясаттың басым бағыттарының бірі болып саналады және ол қоғамда әлеуметтік тұрақтылықты қамтамасыз етуде, құқықтық мәдениетті нығайтуда, сондай-ақ қоғам мен сот арасындағы байланысты жақсартуда маңызды құралға айналып отыр. ⚖️ «Заң үстемдігі» бағдарламасы. Бағдарлама жүргізушісі – Нұргүл ҚАРАҒОЙШИНА
