Аюлы сарқырамасы – туристерге арналған танымал орындардың бірі.Алматыдағы Түрген шатқалында орналасқан Аюлы сарқырамасы туристермен тауға шыққанды жақсы көретін тұрғындардың ең көп баратын орындардың бірі. Алматылықтардың көпшілігі демалыс күндерін осында өткізеді, әсем табиғаттың аясында таза ауада демалуға отбасымен келеді. Аюлы сарқырамасы Іле Алатауы ұлттық саябағының аумағында орналасқан.Сапар орталығы Алматыдан 80 шақырым жерде. Осы жерден Аюлы сарқырамасына баруға болады. Арақашықтығы біржарым километрді құрайды. Жол барлық санаттағы адамдар үшін қолжетімді, әлеуметтік, туристік бағыт болып саналады.Сарқырама теңіз деңгейінен 1600 метр биіктікте орналасқан.Сарқыраманың биіктігі шамамен 30 метр.Бұл жердің Аюлы сарқырамасы деп аталуының себебі мұнда аюлар топтасып тіршілік етеді.Жалпы Түрген шатқалында жеті сарқырама бар. Олардың арасында ең танымалдысы осы Аюлы сарқырамасы. Бұл жерге жақын жердегі қала тұрғындары ғана емес, сонымен қатар шетелдік туристер де келеді. Мұнда тек жазда ғана емес, қыста да келетіндер қатары көп. Тау бөктерінің сонау шыңынан төгіліп жатқан мөп-мөлдір таза су шыршалар мен тастарды бойлай ағады. Аюлы сарқырамасын көру үшін жоғары жетелеген соқпақ жолмен 40 минуттай жаяу көтерілдік. Жол бойы әсем табиғат пен өсімдіктер әлемін тамашалап сарқырамаға қалай жетіп қалғанымызды да білмей қалдық.Сарқыраманың мұздай тамшылары денені сумен бүркіп, әп-сәтте сергітіп жіберді. Жартастан төмен қарай құйылып жатқан сарқыраманың гүрілдеген даусы да құлаққа жағымды әсер етеді.
