Нина Николаевна Васильева 1978 сыллаахха Хабаровскайдааҕы култуура институтун бүтэрэн кэлиэҕиттэн Майатааҕы оҕо музыкальнай оскуолатын дириэктэрэ Владимир Степанович Степанов салайбыт хоровой кэлэктиибин кытта үлэлээн барбыта. Владимир Степанович – дэгиттэр музыкант, баянист – эдэр специалистка сүбэ-ама биэрэрэ, куонкурустар, көрүүлэр иннилэринэ көмө-тирэх буолара. Ол кэмҥэ култуура отделын сэбиэдиссэйинэн үлэлээбит Дмитрий Дмитриевич Тихонов хорга өр сыл ыллаан уонна солиистаан айар үлэтин саҕаланыытыгар улаханнык өйөөбүтэ. Нина Николаевна Дмитрий Тихоновы уонна Владимир Степановы бэйэтин настаабынньыктарынан ааҕара. 1981 сыллаахха Майатааҕы хорга “народнай” ааты иҥэрбиттэрэ. Нина Николаевна 42 сыл устата хорутуулаахтык үлэлээн, Майатааҕы народнай хору элбэх ситиһиилэрдээх салайан кэлэн, хорга кини аата иҥэриллиитэ – олус кэрэхсэбиллээх уонна махталлаах суол. Майатааҕы народнай хорга бу сыллар усталарыгар араас идэлээх үлэһиттэр, атын-атын эйгэттэн кэлэн иллэҥ кэмнэрин атаараллар, кэрэ эйгэтигэр кыттыһаллар. Үгүс өттө музыкальнай үөрэҕэ суох, ол эрээри ыллыан-туойуон баҕалаах дьон хорга дьарыктанан, бэйэлэрэ кэлэктиип буолан, өр сыллар тухары ыллыыллар. Нина Николаевна салайан кэлбит кэлэктиибэ биир дьиэ кэргэҥҥэ курдук бэйэ-бэйэҕэ чугас доҕордуу сыһыаннаах. Бу олоххо өйөһүү, араас түгэннэргэ көмөлөсүһүү, биир санаанан салайтаран көстүүм тигиитигэр да буоллун, араас тэрээһиннэргэ кыттыыны, конкурстарга айаннааһыны даҕаны билигин да салгыыр. Бу сыллар тухары хор репертуара кэҥии турар. Урут даҕаны, билигин даҕаны Майатааҕы народнай хор Мэҥэ Хаҥалас улууһугар ыытыллар туох баар тэрээһиннэргэ сыл устата кыттар – улууспут төрүттэммит күнэ, Дьокуускай куоракка улуус күннэрэ, Саха Өрөспүүбүлүкэтин судаарыстыбаннаһын уонна конституциятын күннэрэ, Майа сэлиэнньэтин төрүттэммит күнэ, чулуу дьоммутугар аналлаах киэһэлэргэ, араас кэнсиэрдэргэ. Нина Николаевна Васильева аатынан Майатааҕы народнай хору салайар Саргылана Павлова 2020 сыллаахха Майаҕа үлэлии кэлбитэ. Бу 3 сыл устата кырата суох үлэ ыытылынна. “Народнай” ааты көмүскээһин, Нина Николаевна Васильева төрөөбүтэ 70 сылыгар улахан тэрээһин, ахтыы киэһээтэ ыытыллыбыта, кини туһунан кинигэ күн сирин көрбүтэ. Араас күрэхтэргэ кыттан ситиһиилэрэ үгүс. Ол курдук... 2020 сыллаахха - Аҕа дойду сэриитигэр улуу Кыайыы 75 сылыгар аналлаах Бүтүн Россиятааҕы хоровой бэстибээл регионнааҕы түһүмэҕин - өрөспүүбүлүкэтээҕи «СЛАВА ТЕБЕ, РОДИНА НАША!» патриотическэй ырыа күрэҕэр 2 степеннээх лауреат уонна сахалыы ырыаны тарҕатарын иһин дипломунан бэлиэтэммитэ. Өрөспүүбүлүкэтээҕи «Страна моя, ты самая любимая» күрэххэ 1 миэстэ, «За яркое и содержательное воплощение темы Арктики» анал диплом хаһаайына. 2021 сыллаахха өрөспүүбүлүкэтээҕи хоровой фестивалга «Академическая манера исполнения» категорияҕа 1 степеннээх лауреат, Бороҕоннооҕу хорга “народнай” аат иҥэриллибитэ 50 сылыгар аналлаах «Ырыа – түмэр күүс» хоровой кэлэктииптэр тэйиччиттэн аһаҕас күрэҕэр Кылаан Бириис хаһаайына, Бүтүн Россиятааҕы хоровой бэстибээл регионнааҕы түһүмэҕэр 1 степеннээх лауреат, Матрена Максимова аатынан Уус-Тааттатааҕы народнай хор төрүттэммитэ 40 сылыгар аналлаах “Дьиэрэй ду, ырыа барахсан...” вокальнай ансаамбыллар уонна хоровой кэлэктииптэр өрөспүүбүлүкэтээҕи тэйиччиттэн күрэҕэр 1 степеннээх лауреат, “Ньургуһун” народнай танцевальнай-хоровой кэлэктиип тэриллибитэ 60 уонна “Дьүөгэлэр” народнай вокальнай кэлэктиип тэриллибитэ 30 сылларыгар аналлаах “Пой, танцуй, играй, Якутия моя!” аһаҕас тэйиччиттэн күрэххэ Кылаан-бириис хаһаайына, Бүтүн Россиятааҕы хоровой бэстибээл Уһук Илин уокуруктааҕы түһүмэҕэр 2 степеннээх лауреат. 2022 сылга “Вдохновение” норуоттар икки ардыларынааҕы бэстибээлгэ 3 степеннээх лауреат, “Наше наследие” Бүтүн Россиятааҕы хоровой күрэххэ 2 степеннээх лауреат, Россияҕа норуоттар культурнай нэһилиэстибэлэрин сылыгар уонна Саха АССР төрүттэммитэ 100 сылагар аналлаах өрөспүүбүлүкэтээҕи көрүү-күрэххэ 1 степеннээх лауреат, “Русь благодатная” өрөспүүбүлүкэтээҕи нуучча ырыатын күрэҕэр 1 степеннээх лауреат. Сыл түмүгүнэн Майа сэлиэнньэтигэр “Бастыҥ уопсастыбаннай түмсүү” анал аат хаһаайына. 2023 сылга Россияҕа педагог уонна Аҕа сүбэһит, Саха Өрөспүүбүлүкэтигэр Үлэ, Сергей Рахманинов төрөөбүтэ 150 сылыгар аналлаах Бүтүн Россиятааҕы хоровой бэстибээл регионнааҕы түһүмэҕэр - «Ырыа дьикти дьүрүһүнэ» өрөспүүбүлүкэтээҕи хоровой бэстибээл 1 степеннээх лауреат буолары ситиһэн, быйыл күһүн Владивосток куоракка ыытыллыбыт 2 Уһук Илин регионун хоровой олимпиадатыгар уонна Бүтүн Россиятааҕы хоровой фестиваль уокуруктааҕы түһүмэҕэр кыттыыны ылан кэллилэр, дипломунан бэлиэтэннилэр. Нина Николаевна Васильева аатынан Майатааҕы народнай хор тэриллибитэ 45 сылыгар аналлаах “Ырыа ыллыгынан” хоровой коллективтар икки ардыларыгар ыытыллыбыт аһаҕас күрэх түмүгүн
билсиэххэ сөп.
