Хадишаның түсі Сол заманда Меккеде ақылына көркі сай, көп сөйлеп созбайтын, әдептен озбайтын Хадиша есімді жесір әйел болды. Байлығына мастанған Меккенің талай сардары оны тоқалдыққа алғысы келетін. Парасатты Хадиша дүниеқоңыз еркек көрсе, жиырылып қалатын. Олардың сұқтана қарайтын ашқарақ көздерінен барынша қашық жүретін. Бір күні ол түс көреді, түсінде ғажап іс көреді. Аспандағы ай келіп, құшағына кірді де, тұла бойын нұрға бөлеп, екі жеңінен сәуле шашып шығып кетті.
