Мектептерді жылытудың ескі әдісі

Еліміздің бірнеше облысында мыңдаған оқушылар аса қауіпті қазандықтармен жылытылатын мектептерде білім алып жатыр. Олай дейтініміз мамандар басқаларға қарағанда, көмір, дизельмен жағылатын қазандықтардың қаупі басым екенін айтады. Оның бір дәлелі Қызылорда облысы Қазалы ауданындағы мектепте үш күн бұрын болған жылу қазандығындағы жарылыс. Ешкім зардап шекпеді дегеннің өзінде күл-талқаны шығып қираған қазандық білім ордасынан небәрі 50 метр жерде орналасқан. Сөйте тұра сабақ жалғасып жатыр. Ата-аналарды үрейлендіріп отырған да осы жағдай. АБАЙ НҰРЖАНҰЛЫ, тілші: – Жүзден аса оқушы оқитын мектепті жылытатын Тасарық ауылындағы бу қазандықтың жарылыстан кейін тас-талқаны шыққан. Ал жарылыс қазандықтың іске қосылғанына небәрі үш күн өткеннен кейін болыпты. Соның салдарынан оқушылар дәл қазір жылуы жоқ мектепте білім алып жатыр. Жарылыс болардан үш күн бұрын қазандықтардың жұмысын тіпті аудан әкімінің өзі келіп тексеріп кетті дейді мектеп басшысы. Айтуынша, тиісті мекемелердің барлығы от жағуға рұқсат берген. Тіпті көмір жағатын бу қазандықтары да жаңа екен. Әйтсе де 113 оқушы сабаққа келер алдында мектеп іргесінде тұрған дәл осы қазандық жарылып, күлі көкке ұшқан. Көңілдері алаңдап жүрген ата-аналар апаттан адам аман қалғанына ғана шүкіршілік етеді. Қазандықтар қадағалауымызда болды деген мектеп басшысы да апатты оқиғаның болғанына таң. Бірақ әзірге мектепті электр құрылғыларымен жылытып отырмыз дейді. Айтуынша жақын арада бюджеттен ақша бөлдіріп тағы осындай қазандықтар орнатпақшы. ӘЛИЯ КЕУЛІМЖАЙ, № 238 мектеп директорының міндетін атқарушы: – Алдағы уақытта модульді бу қазандықтары әкеліп қондырылады деп жоспарлануда. Қазір мектепте барлық оқу үдерісі орнында. Әбіржуге ешқандай негіз жоқ. Ал мамандар дәл осылай көмір мен дизель отынын жағатын қазандықтар аса қауіпті дейді. Айтуларынша мұндай қазандықпен жылытылатын нысандардағы сақтық шараларын бір сәт назардан тыс қалдыруға болмайды. ӘСЕТ ШАЙКИН, Петропавл қаласы ТЖД басқармасының бас маманы: – Қатты отын жағатын қазандықтар орналасқан жерде әсіресе ауа сорғылау жүйелеріне мұқият мән берілу керек. Қазандықтың өзінде де ақау жоқ екеніне көз жеткізу керек. Ал дизель отынын жағатын қазандықтарда құрылғылардың бітеліп қалмағанын қадағалаған абзал. Әйтпесе өрт немесе жарылыс болып қиындық туындау мүмкін. Еліміздің бірнеше өңірінде қауіпті қазандықтар мәселесі әлі өзекті. Ал Тасарық ауылындағы жарылыстың нақты себебі әлі анықталмады. Сондықтан ауылдағы ата-аналар айтпай келген апат тағы да қайталанбаса деп уайымдап отыр. . . . . Бізді әлеуметтік желіде оқыңыздар: Youtube -   / @informburo31kanal   Facebook -   / informburo31   Instagram -   / informburo31   Vkontakte -   vk.com/informburo31   TikTok - www.tiktok.com/@informburo31 WhatsApp Информбюро +7 777 331 31 31 #информбюро #басты_жаңалықтар #Ақиқатын_Айтайық