"НАУРЫЗ-ДУМАН" МЕРЕКЕСІ. ҮРЖАР АУДАНЫ. 2025 ЖЫЛ

НАУРЫЗ-ДУМАН МЕРЕКЕСІ ҮРЖАР АУДАНЫНДА 21 наурыз күні Үржар ауданында Наурыз халықтық мерекесі тойланды. Алаңға қазақ үйлер тігіліп, әр қазақ үйде халқымыздың жеті қазынасы тақырыбында көрме қойылды. Ұлттық тағам түрлерінен аста-төк дастархан жайылды. Ауданымыздың "Асыл мұра" ардагерлер ансамблі бастаған абыройлы еңбек ардагерлері мен ақ кимешекті әжелері әр қазақ үйде қонақ болды. Балалар алаңында оқушылар арасында "асық ату", "бес тас", "арқан тартыс" ұлттық ойындар жарыстар өтті. Ұлттық спорт алаңында қазақша күрес бойынша "Үржар барысы" турниры өтіп, арқан тартыс, қол күрес, мойын тартыс, гирь көтеру, қой көтеру, лақ көтеру бойынша додалар өтті. Орталық алаңда "Наурыз-думан" мерекелік бағдарлама жоғары деңгейде ұйымдастырылды. Той жаршылары Алдар көсе мен Қожанасыр халықты мерекеге шақырды. Сақ патшасы Тарғытай хан мен биыл 350 жылдығы аталып өтетін Ақтамберді жырау образдары сахналанды. Хакім Абай Құнанбайұлының 180 жылдығына байланысты Абай образы сомдалып, ақынға арналған Д.Шаяхметовтің "Хакім Абай" әні шырқалды. Қазақтың киелі пірі Ұмай ана бастаған кимешекті әжелер, ардақты аналар, аяулы бикелер алаңды толтырып, шашу шашты. Наурыз айы оразаға тұспа-тұс келгендіктен "Тарғытай" тобы орындаған жарапазан әні халықты бір серпілтіп тастады. Көрісу рәсімі көрсетіліп, алаңда барша халық "Қаражорға" биін биледі. Қыдыр баба бата беріп, аудан әкімі Ақылбек Башимбаев халыққа ізгі тілегін айтты. Мерекелік қойылым Үржар аудандық мәдениет үйінің өнер ұжымының концертімен жалғасты. Наурыз мейрамында өнер көрсеткен "Көңіл толқыны" халық аспаптар оркестрі, "Тарғытай" тобы, "Ғұмыр" тобы, "Сонар", "Наз", "Шабыт" би топтарына, қойылымда тарихи тұлғаларымызды сомдаған Қ.Сатмұхамбетова, С.Шәкенов, Р.Чүкенова, Е.Қайратұлы, Т.Әлеш, А.Чулгауова, Г.Советова,Н.Тұяқпай, Г.Сатмұхамбетова, Айбек Сыдықов, Мерғалым Тұрсымбековке халық разы болды. Мерекелік шараны жоғары деңгейде ұйымдастырған Үржар аудандық мәдениет үйінің ұжымына үлкен алғысымды айтамын.