Раъно Абдуллаева: 'Мирзиёев ўзбекларга ватанини қайтариб берди'

Би-би-си билан суҳбатда Ўзбекистон Марказқўмининг собиқ мафкура котибаси Раъно Абдуллаева Президент Шавкат Мирзиёевни Файзулла Хўжаев ва Шароф Рашидов сингари арбобларга тенглаштирди. Унинг сўзларига кўра, Мирзиёев қисқа вақт ичида ўзбекларга "ўзлигини қайтариб берди" ва уларни "йўқ бўлиб кетишдан асраб қолди". Раъно Абдуллаеванинг фикрича, Мирзиёев Ислом Каримовнинг эмас, балки "Шароф Рашидов ишининг давомчисидир". Ўтмишда Ўзбекистоннинг мафкура соҳасидаги энг қудратли раҳбарларидан бўлган Раъно Абдуллаева ҳозир 82 ёшда. У Каримов даврида ижтимоий-сиёсий ҳаётдан четлатилганди. Аммо шу ҳафта Жиззахда ўтган Шароф Рашидов ҳайкалининг очилишига бағишланган тантанали маросимга таклиф этилган. Абдуллаева 1963-1971 йилларда Ўзбекистон комсомолининг биринчи котиби, ундан сўнг эса Ўзбекистон ССР Министрлар Совети (Вазирлар Маҳкамаси) раисининг ўринбосари ҳамда 1987 йилга қадар Ўзбекистон Компартияси Марказқўмининг мафкураси котибаси лавозимларида ишлаган. 1986 йилда "пахта иши"да айбланиб, ҳибсга олинган, аммо икки йил ўтиб, СССР Олий суди коллегияси уни оқлаган. "XX аср ва буюк давлат - СССРнинг парчаланиши" номли китоби Москвада чоп этилган. Совет даврида Ўзбекистонда диний ва миллий қадриятларга қарши ҳужумлар, жумладан, Наврўзнинг тақиқланиши ва аёлларнинг рўмол ўрашига қарши кампаниялар Абдуллаева номи билан боғланади. Аммо Раъно Абдуллаеванинг ўзи бу даъволарни рад этади. Би-би-си Ўзбек хизматининг видеоларини www.bbcuzbek.com да ҳам кўришингиз мумкин.