VIDEO
Суперлининг 27-туридан ўрин олган турнинг марказий ўйинида "Навбаҳор" амалдаги чемпион “Насаф” (Қарши)ни қабул қилди. Мазкур клублар ўртасидаги баҳслар доимо кескин ва шиддатли курашлар остида кечган ҳамда албатта ушбу учрашув ҳам бундан мустасно бўлмасди. Мазкур ўйинга қизиқиш юқори бўлгани боис ҳам ушбу учрашувни томоша қилгани қўшни Қирғиз Республикаси ҳамда Фарғона вилоятидан ҳам мухлислар ташриф буюриб, мезбонларга мухлислик қилишди. Учрашув борасида тўхталадиган бўлсак, ўйин илк дақиқаларданоқ шиддатли тарзда бошланиб, ташаббус гоҳ у, гоҳ бу жамоа тарафида бўлди. Биринчи бўлим давомида мезбонлар Русланбек Жиянов, Аббосжон Ғуломов, Шоҳмалик Комилов ҳамда Муҳаммадали Ғиёсов, қаршиликлардан эса жамоа сардори Умарбек Эшмуродов, шунингдек, албаниялик ва сербиялик ярим ҳимоячилар – Аденис Шала ҳамда Драган Черанларда имкониятлар юзага келди, аммо айрим вазиятларда дарвозабонлар ўз маҳоратларини намойиш этишган бўлса, баъзи ҳолатларда футболчиларнинг зарбаларига аниқлик етишмади ва жамоалар танаффусга 0:0 ҳисобида йўл олди. Иккинчи бўлимни фаол тарзда бошлаган Рўзиқул Бердиев шогирдларининг илк ҳужуми хавфли кўриниш олиб, Драган Черанннинг жарима майдони чизиғи ёнидан йўллаган зарбасида сўнг, тўп дарвоза тўсини ҳамда чизиғига тегиб қайтди. Кейинги вазиятда эса Чераннинг зарбасига аниқлик етишмади. Шунингдек, Ҳусайн Норчаевнинг зарбасидан сўнг, тўпни жамоамиз дарвозабони Шукрон Йўлдошев қайтарган бўлса, Аденис Шаланинг зарбасига аниқлик етишмади. Шерзод Жўраев шогирдларининг 2-бўлимдаги дастлабки ҳужумида Забиҳилло Ўринбоевнинг зарбаси йўлига Умарбек Эшмуродов тўғаноқ бўлди. Иккинчи 45 дақиқаликда шунингдек, “лочинлар”дан Шоҳмалик Комилов ва Аббосжон Ғуломовнинг зарбалари ноаниқ чиққан, бундан ташқари, бир вазиятда захирадан майдонга тушган жамоамизнинг бразилиялик ҳужумчиси Аугусто Педронинг зарбасидан сўнг, тўпни қаршиликлар посбони Абдувоҳид Неъматов қайтарган бўлса, “аждарлар”дан Ҳусайн Норчаев ва Драган Чераннинг зарбаларига аниқлик етишмади. Умуман олганда, мазкур беллашувда “Навбаҳор”нинг барча аъзолари жуда яхши ўйин намойиш этишди. Натижада учрашув нурсиз дуранг – 0:0 ҳисобида якунланди ҳамда ушбу натижа "Навбаҳор" (ва "Нефтчи") учун ғалабага тенг дуранг бўлди. Ўзбекистон Суперлигаси. 27-тур “НАВБАҲОР” – “НАСАФ” - 0:0 30-октабр. Наманган. “Марказий” стадиони. 7152 томошабин. Ҳакамлар: Илгиз Танташев, Андрей Сапенко, Тимур Гайнуллин, Салоҳиддин Акрамов. ВАР ҳаками: Абдурашид Худойберганов. АВАР: Эдита Миробидова. Назоратчи: Бахтиёр Тоғаев. Комиссар: Диёр Ҳотамқулов. “Навбаҳор”: 16.Шукрон Йўлдошев, 8.Шоҳмалик Комилов, 9.Забиҳилло Ўринбоев (29.Педро Аугусто, 68), 11.Муҳаммадали Ғиёсов (22.Асадбек Жўрабоев, 90+6), 12.Саидазамат Мирсаидов (5.Жулио Сезар, 77), 13.Бенжамин Тейди, 17.Русланбек Жиянов, 24.Достонбек Абдулҳаев (32.Муҳаммадбобур Мўйдинов, 68), 36.Гилерме Гедеш, 70.Аббосжон Ғуломов, 99.Igor Габриел. “Насаф”: 35.Абдувоҳид Неъматов, 7.Аденис Шала (20.Usuf Отубанжо, 90), 10.Драган Черан, 14.Шароф Муҳиддинов, 18.Ҳусайн Норчаев, 19.Стефан Чолович (9.Жавоҳир Сидиқов, 60), 22.Igor Голбан, 24.Сардорбек Баҳромов, 28.Шуҳрат Муҳаммадиев (8.Зафармурод Абдираҳматов, 60), 34.Шерзод Насруллаев (2.Алибек Давронов, 77), 92.Умарбек Эшмуродов. Огоҳлантиришлар: Г.Гедеш (45+4) – Ш.Муҳаммадиев (24), Ш.Тошпўлатов (мураббий,68), Д.Черан (88).
