Сайт использует сервис веб-аналитики Яндекс Метрика с помощью технологии «cookie». Пользуясь сайтом, вы даете согласие на использование данной технологии.
Псало́м Дави́ду 140 Припев: Да испра́вится моли́тва моя́, я́ко кади́ло пред Тобо́ю, воздея́ние руку́ мое́ю – же́ртва вече́рняя. Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́. Припев: Да испра́вится моли́тва моя́, я́ко кади́ло пред Тобо́ю, воздея́ние руку́ мое́ю – же́ртва вече́рняя. Положи́, Го́споди, хране́ние усто́м мои́м,/ и дверь огражде́ния о устна́х мои́х. Припев. Не уклони́ се́рдце мое́ в словеса́ лука́вствия,/ непщева́ти вины́ о гресе́х,/ с челове́ки де́лающими беззако́ние,/ и не сочту́ся со избра́нными их. Припев. Нака́жет мя пра́ведник ми́лостию и обличи́т мя,/ еле́й же гре́шнаго да не нама́стит главы́ моея́,/ я́ко еще́ и моли́тва моя́ во благоволе́ниих их. Припев. Поже́рты бы́ша при ка́мени судии́ их:/ услы́шатся глаго́ли мои́,/ я́ко возмого́ша. Припев. Яко то́лща земли́ просе́деся на земли́,/ расточи́шася ко́сти их при а́де. Припев. Яко к Тебе́, Го́споди, Го́споди, о́чи мои́:/ на Тя упова́х, не отыми́ ду́шу мою́. Припев. Сохрани́ мя от се́ти, ю́же соста́виша ми,/ и от собла́зн де́лающих беззако́ние. Припев. Паду́т во мре́жу свою́ гре́шницы:/ еди́н есмь аз, до́ндеже прейду́. Да испра́вится моли́тва моя́, я́ко кади́ло пред Тобо́ю, воздея́ние руку́ мое́ю – же́ртва вече́рняя. Да испра́вится моли́тва моя́, я́ко кади́ло пред Тобо́ю, воздея́ние руку́ мое́ю – же́ртва вече́рняя.
