Сайт использует сервис веб-аналитики Яндекс Метрика с помощью технологии «cookie». Пользуясь сайтом, вы даете согласие на использование данной технологии.
Маштексай ауылдық мәдениет үйінде ауылымыздың азаматы, мәдениет саласының қызметкері Ұлан Оразайұлы Баесовты еске алу кеші өтті. Туған елдің төл перзентінің бақилық дүниеге аттанғанына бір жыл толуына орай өткізілген кешке Ұлболсын анамыз, артында қалған ұл-қызы, бауырлары және аудан әкімінің орынбасары Ақнұрлы Нұрғалиқызы, Орал қаласының Мәдениет және тілдерді дамыту бөліміне қарасты «Жастар мәдениет сарайы» ұжымы, достары мен ауыл азаматтары қатысты. Өмірі өнермен өрілген, ,шын өнер жанашыры бола білген бауырымыздың қайғысы бәріміздің қабырғамызды қайыстырғаны анық. Ол ауылымыздың мәдениет саласында елеулі қызмет атқарып, өзінің шығармашылығының биіктігін мойындата білген азамат. Жерлесімізді еске алу әсерлі кешінде Жанайдар Болатбекұлының дайындауында Ұ. Оразайұлының өмір жолынан бейнебаян ұсынылды. Онда Ұланның ұстаздары Гүлсара Ғалымжанқызы, Ақмарал Аманқызы оқушысы туралы естелік әңгімелерімен бөлісті. Сондай-ақ достары, әріптестері де оның үнемі күлімдеп жүретін нұрлы жүзі білікті, білімді, қарапайым жан ретінде жадымызда қалады деп сыр шертті. Жерлес ақын Алтынбек Ермекқалиевтің «Ұлан ағама арнау» өлеңін Нұрлан Хамзин оқыса, өмірде бірге жүрген Саясат Бексариев досына деген сағыныштан туған «Сағындым сені Ұланым» әнін жүрекке жеткізе орындады. Көзі тірісінде Ұлан Баесов пен досы Ерсайын Қажығалиев орындайтын «Жамалым» әнін ұлы Әкежан Ұланұлы мен Ерасыл Қанатұлы орындаса, шәкірт інісі Сәтжан Баязиев «Жан досым» әнін шырқады. Сондай-ақ басқа да әріптес жолдастары досына арналған ән арқылы ыстық сағынышын білдіріп жатты. Облыстық жастар мәдениет сарайының директоры Медет Мерғалиев, мәдени ағарту бірлестігі директорының орынбасары Мейірбек Қажығалиев, аудандық мәдени-демалыс орталығының директоры Мұхит Сисенов жұбайы Гүлмира мен кішкентай бүлдіршінімен бірге жол апатынан жазым болған туған жердің ұлар құсындай болған Ұланның анасын ортаға шақырып көңіліне медеу болып, әкесінің көзіндей болған ұл-қызына арнап сый-сыяпат тарту етті. Ауыл әкімі Ержан Нағымұлы да барлық тума-туыстарына көңіл айтып, қос құлынын тәрбиелеп отырған анасына аман отыруын тілеп, сый құрметін көрсетті. Өз кезегінде анасы Ұлболсын мен нағашы інісі еске алу кешіне атсалысқан барша жанашыр жандарға алғыстарын жеткізді. Иә,қадірлі ауылдасымыздың өнер жолындағы еңбегі ауылымыздан шыққан шоқтығы биік өнер тарландарының қатарынан орын алады. Видео авторы Самал Есқазиева.
