Талғат Бигельдинов атындағы әуе қорғанысы күштері әскери институтына биыл қабылданған курсанттар ант қабылдады. Салтанатты шара сенбі күні оқу орнының саптық алаңында өтті. Оқуға түсер кездегі физикалық сынақтардан сүрінбей өтіп, жас жауынгер курсын жақсы бітіріп шыққан бұл жігіттер бүгін ата-аналарының, институт басшылығы мен оқытушылар, жолдастарының алдында Қазақстан халқына адал болуға, ел заңдарын қатаң сақтауға ант берді. Ұшқыштарды дайындайтын оқу орнына түсу қиын. Биыл бір орынға төрт адам таласқан. Білімді де, білікті 96 жігіт іріктелді. Оның 24-і ақтөбелік, 14-і Қырғызстан мен Тәжікстан елдерінен. Курсанттар бес жыл тегін білім алады. Мұнда ұшқыштар, инженерлер, механиктер, электриктер, барлығы тоғыз түрлі мамандық оқытылады. Былтырдан бері әскери дәрігерлер даярлана бастады. Ал, биыл жаңадан ұшқышсыз басқарылатын ұшу аппараттарының операторы мамандығы ашылды. Дегенмен, бірінші курсқа түскендердің тең жартысы ұшқыш мамандығын таңдаған. Сайт телеканала
Twitter / rika_kz Вконтакте
https://vk.com/rikatv 