Көкжарлы Барақ – қазақ тарихындағы ұлы қаһарман. Абылай ханның қаһарман сарбазы, халқы көкжал атандырған, аты үш жүзге мәшһүр тарихи тұлға Көкжал Барақ Шүрекұлының туғанына биыл 320 жыл. Барақ батырдың есімін ұлықтап, ерен ерлігін өскелең ұрпақ жадында қалдыру мақсатында А.С. Пушкин атындағы ШҚО кітапханасының қызметкерлері маусым айында Барақ батырдың ұрпақтары мекендеген Күршім жеріне өлкетану экспедициясын жасады. Сапар барысында кітапханашылар "Көкжарлы Көкжал Барақ" кітабының авторы, Қазақстан Республикасының оқу-ағарту ісінің үздігі, Көкжал батырдың ұрпағы Қайырбаев Танаш Мәлгаждарұлының жетекшілігімен тарихи орындарды аралады, Барақ батырдың ұрпақтары мекен еткен Теректібұлақ ауылында болып, тарихи жәдігерлермен танысты, батыр ұрпақтарымен сұхбаттасты. Нәтижесінде деректі фильм дайындап шығарды.
