Ұлт үшін туған Ыдырыс. Деректі фильм. Ыдырыс Көшкінов 125 жыл

Ыдырыс Көшкінов 1897 жылы 17 қарашада бұрынғы Жетісу облысы Жаркент уезіне қарасты Меркі болысында (қазіргі Алматы облысы, Кеген ауданы, Ұзынбұлақ ауылы) дүние есігін ашып, кеңестік Қазақстандағы көрнекті қоғам және мемлекет қайраткерлерінің біріне айналды. 27 жасында Жетісу губерниялық атқару комитетінің төрағасы қызметіне тағайындалды. 1926-1928 жылдары Ақтөбе губерниялық атқару комитетінің төрағасы, 1928-1930 жылдары Ақмола округтік атқару комитетінің төрағасы, 1930-1932 жылдары БКП(б) Қазақ өлкелік комитеті Бақылау комиссиясы төрағасының орынбасары – ҚАКСР Жұмысшы-шаруа инспекциясы халық комиссарының орынбасары қызметтерін абыроймен атқарды. 1932 жылы 10 наурызда Қазақстанда құрылған 6 облыстың бірі – Қарағанды облысының атқару комитетінің төрағасы қызметіне тағайындалса, 1933-1934 жылдары Батыс Қазақстан облыстық атқару комитетінің төрағасы қызметін атқарды. Яғни, екі облыста да Қазақстанның алтыдан біріне тең болатын аймаққа басшылық жасады. 1934-1935 жылдары ҚАКСР Жер-су халкомының мал шаруашылығы бойынша орынбасары, 1935-1937 жылдары БКП(б) ОК жанындағы ҚазКСР бойынша Қазақстан КП(б) өкілетті өкілінің екінші орынбасары, 1937-1938 жылдары ҚазКСР Халық Комиссарлар кеңесі жанындағы Бас арбитр қызметтерін атқарды. 1938 жылы 27 наурызда тұтқындалып, 1940 жылы 26 қазанда КСРО ІІХК жанындағы Ерекше кеңес (ОСО) шешімімен қуғын-сүргін құрбаны болып Еңбекпен түзеу лагеріне 8 жылға сотталып кете барды. Архангельск облысындағы лагерьде жүріп 1944 жылы қайтыс болған Ы. Көшкінов тек қана 1954 жылы қарашада ақталды.