VIDEO
"Хань" 1. Намрын налгар өдрүүд алсран хүйтний ам наашилсан цаг дор банз нь энд тэндээ ховх татагдан алаг цоог болсон хашаанд хоёр жаахан хүү тоосго чулууны хэлтэрхийгээр байшин барьж тоглох бөгөөд тэднээс холгүйхэн үс ноосондоо баригдсан хөгшин халтар нохой гуринхлан хэвтэнэ. Хөвгүүд өвдөг нь цоорч элэгдсэн өмд углаж дан цамц өмссөн боловч хүйтнийг үл ажран тоглоомондоо улайран тоглох нь хир баргийн хүйтэнд ажрахгүй дассан гэдэг нь илт. Үүнээс цааш харвал хааш хаашаа дөрөв тавын харьцаатай жижгэвтэр байшин харагдах ба цагаан шоохойгоор будсан нь халцарч шавар нь энд тэндээ унасан байх боловч хаалга нь дөнгөж сольсон болов уу гэмээр шинэвтэр. Удалгүй байшингийн хаалга нээгдэж арван дөрөвтэй болов уу гэмээр сөөсгөр шар охин гарч ирээд сайхь хоёрт хандаж Хурдан ороод ир гэчихээд хариу сонсолгүй буцаад орчихов. Тэгэхэд сайхь хоёрын арай ах нь бололтой хүү хувцсаа гөвөн босож -Үүрдээ одоо тоглохоо больё. Эгч лав хоол хийсэн байх шүү гэхэд дөрөв тавтай болов уу гэмээр жаахан хүү хоолны сургаар сэртэсхийн босож ахыгаа орхиод тоодогнон гүйж одов. Байшинд ороход ердөө нэг өрөө байх. Үүдний хавьцаа хананд өлгүүр зоож том жижиг хэдэн гадуур хувцас өлгөөд чанх доор нь шалаар гутал хөглөрч харагдана. Үүнээс үргэлжлүүлэн сандал ширээ гал тогооны жижигхэн хэсэг оршино. Хоймор хэсэгт ихэнхи айлуудад байдаг хуучны цагаан арслантай авдарны дээр нугастай толь түүний урд эвтэй дөрвөн амьтан болоод өвөр дээрээ олон жаахан хүүхэд суулгасан Энх-амгалан хэмээх сувинер харагдана. Ганц том модон ор байх. Дээгүүр нь хөглөрсөн хувцас, хөнжил, хүүхдийн хичээлийн цүнх дэвтэр ном гээд эх захгүй олон юм овоолж орхисон байв. Үүн дээр нэмээд хаалга нь гажсан хувцасны шүүгээ, газраар дэвссэн улаан эрээн ширдэг, хананд чаг чагхийн дуугарах цаг. Ийм л цомхон айлд гурван хүүхэд нурсаа шорхийтэл татаж гурилтай шөл идэж сууна. Эгч сөөсгөр охиныг Намуунаа гэнэ. Харваас гэрийн ажилд хар багаасаа дадаж хоол унд хийж сурсан нь илхэн. Тэр ч байтугай хоёр дүүдээ ажил хуваарилан яг таг хийлгэнэ. Бор ходоодоо божийтол дүүргэсэн хоёр команд авсан цэрэг шиг хоолоо идэж дуусав уу үгүй нэг нь иш хугархай хогийн шүүрээ шүүрч аваад тоос шороо бужигнуулан ширдэгээ шүүрдэж нөгөөх нь пүмпэнд ус хийн зуухан дээр тавьж багахан бүлээсгэж аяга халбагаа угаах нь бахтай. Үүрдээгийн ах Жаргал хугархай шүүрээ голох мэт өнөөхийгөө байн байн эргүүлж тойруулж харсан ч өөрт оногдсон ажлаа хийж дуусгав. Угтаа бол урьд шөнө аав нь уусан жаахан архиндаа арслан барын дүртэй болоод орон гэрээ түйвээхдээ хаалганы хажууд гэмгүй хэвтэх шүүрээр ширээ шаахдаа хугалсан нь тэр байв. Гурван хүүхэд тус тусын ажлыг хийж дуусаад үдэш болохын алдад байсхийгээд хашааны завсраар булталзах нь ээж ажлаа тараад ирэх болсоны дохио. Ээж Уяралмаа нь цэцэрлэгт туслах багш хийдэг. Орой ажлаасаа ирэхдээ том том зүссэн чихэртэй талх авчирна. Үүнд хүүхдүүд жигтэйхэн дуртай. Тэр болгон идээд байж чадахгүй элсэн чихэр түрхэж бага зэрэг усаар норгосон талх амтат бялуу л гэсэн үг. Мөн ёсоор Уяралмаа нилээд хэдэн талх авчирчээ. -Миний хүүхдүүд гэрээ сайхан цэвэрлэжээ. Аав нь бас л ирээгүй байна уу. Дахиад л ууж яваа байх даа. Гайгүйхэн шиг ирээсэй дээ гэхэд Намуунаа -Ээжээ бид гурав гурилтай шөл хийж идсэн. Танд халаах уу? -Өө юүхэв. Ээж нь ажил дээрээ хоол идчихсэн. Хэсэг сайхан амрая. Хүүхдийн шуугианд бүр толгой хагарах шахлаа гээд хоёр бага хүүгийнхээ түнжин толгойг үнэрлээд Аривжихыг бага уусан байгаасай гэсээр хажуулав. / 1aihm8yehm Т. Сайхан - / t.sajhan.2025 Анхаарал тавьсан та бүхэнд Баярлалаа😉
