Ақтауда үйдің жертөлесінде жойқын жарылыс болып, бес адам зардап шекті

Ақтауда үйдің жертөлесінде жойқын жарылыс болып, бес адам зардап шекті. Ауруханаға жеткізілген науқастардың үшеуі бала. Тіпті қатты дүмпуден бірнеше пәтер бүлініп, көліктердің әйнектері сынған. Жан сауғалаған жұрт бір-біріне көмектесіп, қауіпсіз жерге жеткен. Тұрғындар кәсіпкер шығынды толық өтеп берсін деп отыр. Олар баспана астындағы коммерциялық нысандар өрт қауіпсіздігін сақтамайды деп күйінеді. Оқиғаның мән-жайын өңірдегі әріптесім Махаббат Нұржанқызы біліп келді. Қатты жарылыстан қорқып қалған жұрт бірден далаға жүгірген. Дүрліккен тұрғындар демалыс кезінде үйде отырған оқушыларды да жетектеп қауіпсіз жерге жеткізіпті. Қамсыз жүрген көп алғашында абдырап, не болғанын түсінбей қалдық дейді. ТӨРЕБЕК САЙЛАУ, Ақтау қаласының тұрғыны: Бірінші терезеден қарағанда забордың құлағанын байқадым. Одан кейін жертөледен бір адам шығып келе жатты үсті өртеніп, сыртқа жүгіріп шықтым. Подъезден адамдар шығып жатыр екен жәймен, дереу бірінші этажға кіріп, бірінші этаждан үш кішкентайды алып шықтым. Сосын қалған кім бар екен деп 5 этаждан тағы да үш баланы алып шықтым. МАХАББАТ НҰРЖАНҚЫЗЫ, тілші: Жарылыс тұрғын үйдің жертөлесіндегі тұрмыстық техника жөндеу орталығында болған. Апаттың нақты себебі әзірге белгісіз. Дегенмен, дүмпудің қатты болғаны сонша, тұрғын үйдің сыртындағы қоршау мен бірінші қабаттағы пәтерлердің терезелері қираған. Жарылыстан жақын маңда тұрған бірнеше көліктің әйнектері сынып кеткен. Бірінші қабаттағы бірнеше пәтер бүлінген. Тұрғындар кәсіпкер шығынды толығымен өтеп берсін дейді. Халық үй астындағы коммерциялық нысандардың барлығын тексеруді талап етеді. МАРАТ АЙТБАЕВ, Ақтау қаласының тұрғыны: Коммерческий болғанда бұның барлығы астына ремонттайтын зат әкелген, газ толған жарылған асты. Міне үстінде біз жасап жатырмыз. Астында ойына келген заттарды істеп жатыр. Адамның тағдырымен астында бір адам газбен ойнап отыр. Не деген масқара мынау? Мынаны кім қарайды? Ал жарылыстан зардап шеккен 5 адам дереу ауруханаға жеткізілген. Денесін күйік шалған 52 жастағы науқастың жағдайы ауыр. 22 жастағы жігіт медициналық көмектен соң үйіне жіберілген. Ал 7, 10, 15 жастағы үш жеткіншек газға уланған екен. Екі бала амбулаториялық емге алынды. ЖАНАР МАЙМАНОВА, Маңғыстау облыстық денсаулық сақтау басқармасының бөлім басшысы: Ересектердің ауруханасына жеткізілген пациенттердің біреуінің жағдайы ауыр, реанимацияда жатыр қазіргі таңда, 50-60 пайыз күйік шалған. Угарды газбен улану диагнозымен болжамда. Екінші пациент балалар ауруханасында ол пациенттің жағдайы қанағаттанарлық, тұрақты. Полиция «өрт қауіпсіздігі талаптарын бұзу» дерегі бойынша қылмыстық іс қозғады. Апаттың нақты себебі мен жай-жапсары тергеу барысында анықталмақ. #Информбюро #31арна #БастыЖаңалықтар #Ақтау #жарылыс