Баай Дабыыдап хаан-уруу сиэнэ Будникова Виктория Николаевна кэлэн олохтоохтору кытта көрсүстэ.

Кулун тутар 13 күнүгэр Дьокуускай куораттан баай Дабыыдап хаан-уруу сиэнэ, 85 саастаах Будникова Виктория Николаевна, кыыһынаан Марина Александровналыын Кыйыга кэлэн олохтоохтору кытта көрсүһэн, Өксөкүлээх Өлөксөй скверигэр сылдьан ыалдьыттаан бардылар. Манна диэн эттэххэ, сквер турар сирин олохтоох краеведтар ыйбыт сирдэрин кини сөбүлэһэн, өссө сквергэ Пушкинскай ыскамыайкалары оҥорорго сүбэлээбит. Онтон эһэтэ Дмитрий Давыдов туппут 100 сылын ааспыт уораҕайыгар, билигин оскуола-интернат остолобуойугар "Айылгы" түмсүү астаабыт астарынан мааны ыалдьыттарын күндүлээтилэр. Виктория Николаевна Давыдовтар, Оросиннар уонна Саха бастакы композиторын, племяннигын Адам Скрябин туһунан сэдэх хаартыскаларын көрдөрөн истээччилэрин олус умсугутан интэриэстэрин тардан кэпсээбититтэн бары да астынныбыт, билбэтэхпитин биллибит. Николаевна Адам Скрябин туһунан таһааттарбыт брошюратын олохтоох библиотекаҕа бэлэх уунна. Салгыы ытык саастаах ыалдьыппыт бэйэтин көрүүлэрин билиһиннэрдэ, наадалаах сүбэлэри биэрдэ. Өссө да салгыы билсиһиэх, сибээһи тутуһуох буолан, төрүттэрэ олохсуйбут сирдэригэр Тыараһаҕа кэлиэх буолан бардылар.