Осыдан бес күн бұрын Ақтаудағы 25/ 744 әскери бөліміне Отан алдындағы борышын өтеуге барған 19 жастағы Талғат Айтмұханов өз-өзімен сөйлесіп, сандырақтайтын жағдайға түскен. Сарбаздың жақындары, есі кіресілі-шығасылы баламыз туған әкесін танымай қалды дейді. Әйтсе де дәрігерлер Талғаттың денсаулығында еш кінәрат жоқ деген тоқтамға келіпті. Енді "тепсе темір үзетін ұлымды әскерге сау күйінде алдап әкетіп, ауру қылды" деген әкесі құзылы органдарға шағым түсірмек. Мақсат Сәрсенбаевтың айтуынша, 11 мамыр күні Бейнеу ауданының әскери комиссариатына барған баласы Талғатты екі офицер медициналық тексеруін аяқтамай жатып пойызға отырғызып жіберген. Сөйтіп, 14-ші мамырда жас жігіт Ақтаудағы 25/744 әскери бөліміне қабылданған. Алайда күні кеше әскерилер хабарласып, ұлдарының ауырып қалғанын айтқан. Мұны естіген сарбаздың әкесі алып-ұшып Ақтауға жетіпті. Бірақ, "өз көзіме өзім сенбедім" дейді. Сөзінше, тепсе темір үзетін спортшы баласы ақыл-есінен адасып, әр нәрсені сандырақтап сөйлеген. МАҚСАТ СӘРСЕНБАЕВ, Талғат Айтмұхановтың әкесі: – Кеше мамасына звондаған балаң ес-түссіз жатыр, балаңды қаратуымыз керек деп. «Аты-жөнін білмейді, келмесеңіз болмайды» деп. Бала деген ондай айта алмайды, тек тулайды, әр затты айтып кетеді. Терезені жап, терезені аш деп терезеге қарай жүгіреді. Баламды танымай қалдым. Сарбаздың әкесі «балам әскерге өз еркімен кеткен жоқ, оны алдап әкетті» дейді. Әрі, бес күн бұрын ғана сау кеткен ұлының есі кіресілі-шығасылы күйіне қарап не істерін білмей отыр. Талғат қазір бірде сөйлеп, бірде жақ ашпай қалады екен. Соған қарамастан облыстық ауруханадағы дәрігерлер "оның денсаулығында еш кінәрат жоқ" деп шығарып салған. Бұған келіспеген жақындары Талғаттың психикалық ауытқуы бар-жоғын анықтау үшін диспансер мамандарына тексертпек. Алайда, ондағылар баламызды қабылдамай жатыр дейді. Ал сарбаздың өзі әскери бөлімде біреудің ұрғанын айтқан. Әскери бөлімдегілер Талғатты алдап, әскер қатарына қоспадық дейді. Айтуларынша, ол арыз жазып, өз еркімен келген. Ал жас жігіттің денсаулығындағы кінәратты кеше күндіз сағат 12-лер шамасында байқадық деп отыр. ЖАНЫБЕК ҚҰРАНБЕКОВ, 25744 әскери бөлім командирінің бірінші орынбасары: – Жас жігіт медициналық тексеруден өткізу үшін облыстық ауруханаға жеткізілді. Тексеру нәтижесінде МРТ, мидың КТ және маманның кеңесі, дене жарақаттары мен қауіпті потологиялары анықталған жоқ. Әскерге жіберу үшін аудандық қорғаныс істер жөніндегі бөлімге мәжбүрлеп жеткізуге қатысты ақпарат нақты емес. Ал Талғатты әкесі енді әскерге қайтып жібермеймін деп отыр. Бұл іс бойынша құзырлы органдарға шағым жазбақ. Айта кетейік, былтыр дәл осы әскери бөлімде борышын өтеген қызылордалық сарбаз Ринат Жеткергенов те есінен адасып, ата-анасын танымайтындай күйге түскен еді. Қазір ол ем қабылдап жатыр. Бірақ іске қатысты тергеудің шешімі шыққан жоқ. Махаббат Нұржанқызы, Фархад Шадкам Бізді әлеуметтік желіде оқыңыздар: Youtube - / @informburo31kanal Facebook - / informburo31 Instagram - / informburo31 Vkontakte -
https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #Әлімжеттік #әскер #ҚазақстанӘскері #дедовщина