Қазақстанда несиесін төлей алмай, қара тізімге енген адамдар саны - бір жарым миллионға жеткен. Бұл азаматтардың қарыздан құтылып, жаңа өмір бастауы үшін Президент «жеке тұлғалардың банкроттығы» туралы заң қабылдауды жарты жыл бұрын тапсырған еді. Алайда, экономистер мен кірістер комитеті әлі күнге дейін заң жобасын талқылаумен келеді. Өзіңді банкрот деп жариялау үшін қат-қабат қағаз жинау, шотыңа бір мың теңге түссе, соны табыс деп есептейтін ережелерді алып тастау ұсынылып жатыр. Өмір Серікбекұлы тақырыпты толығырақ тарқатып беруге дайын. Өмір банкроттық туралы заңды кімдер талқылады? Не айтылды? Халық партиясының мәліметінше, қазіргі кезде 6 млн 300 мың қазақстандықтың мойнында несие бар. Тағы 1 млн 200 мың адам шағын қаржы ұйымдарынан кредит алған. Жалпы берешектің көлемі 11 триллион 400 миллиард теңгені құрайды. Соңғы 3 жылда несие беру 70 пайызға ұлғайыпты. Партияның өз есебі бойынша 1 жарым миллион адам қара тізімге еніп, несие төлей алмайтын жағдайға жеткен. Енді, банкроттық туралы заңды барынша жеңіл ету керек деген ұсыныс айтып жатыр. РАХЫМ ОШАҚБАЕВ, «Халық партиясы» төрағасының орынбасары: – Ұсынылып отырған заң жобасында қиын ережелер жазылған. Қазір қарыз алушылардың 3-тен бірі өзін банкрот деп жариялауға болатын азаматтар. Яғни, бұл азаматтардың берешек қайтаруға жағдайы жоқ деген сөз. Сондықтан, банкрот туралы заңды тезірек қабылдаған абзал. Келесі сессияға қалдырмай-ақ, 2 немесе 3 айдың ішінде қабылдап тасау керек еді. Сонда бүгін заң жобасын талқылауға жиналғандар банкрот деп жариялау бойынша нақты қандай ұсыныстар айтты? Рахым Ошақбаев ата-анасы төлей алмаған несиені балалары төлеу керек деген тәжірибені мүлдем алып тастауды ұсынды. Себебі, бұндай қарыз өндіру амалы адамды өсірмей, борышқа одан ары батыру болып табылады дейді. Ал, экономист Асқар Қысықов жеке тұлға сотқа жүгінбей, яғни қарызы 5 миллион теңгеге жетпейтін азаматтар, өзін банкрот деп жариялауы үшін "есепшотына бір теңге де түспеуі керек" деген критерийдің қажеті жоқ дейді. Сондай-ақ, борышкер кредитін жабуға тырысқанын дәлелдейтін қағаз да артық деп есептейді маман. АСҚАР ҚЫСЫҚОВ, Экономист: – Банкрот деп жариялау рәсімін барынша жеңілдету керек. Өзі қарызға белшесіне батқан азаматты қинамаған дұрыс. Егер, азаматтың басында үйі жоқ болса, кірісі болмаса процесс небәрі 1 ай уақытқа созылу қажет. Біздің бір түсінбейтініміз - банкрот болған азаматты 3 жыл бойы бақылауда ұстап отыру. Өзі бірнеше шектеуге тап болған азаматты тағы қадағалаудың не керегі бар? Ақша тауып, үй алып, жағдайын жасаса ол өз еркі емес пе? Бұл норманы да алып тастаған дұрыс. Банкрот деп тануға өтінім бергеннен кейін бірнеше жыл несие алудан шеттетілесіз. Қазақстаннан да шыға алмай қаласыз. Сонымен қатар, адвокат, бағалау мамандығы, жеке сот орындаушы сияқты бірнеше салада қызмет атқара алмайсыз. Қазір жұмыс тобы аталған заңды жан-жақты талқылап жатыр. Кірістер комитетінің ақпарына сай құжат келесі жылдан бастап күшіне енеді. Өмір Серікбекұлы, Дидар Елеуов Бізді әлеуметтік желіде оқыңыздар: Youtube - / @informburo31kanal Facebook - / informburo31 Instagram - / informburo31 Vkontakte -
https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #несие #қаратізім #банкроттық
