ВЕЛОМАРАФОНҒА 200-ДЕН АСТАМ ҚАЛА ТҰРҒЫНДАРЫ ҚАТЫСТЫ

Шымкент қаласында 25 қазан – Республика күніне орай қала тұрғындары арасында веломарафон жарысы өтті. Спорттық шараға 200-ден астам қала тұрғындары қатысты. Ең жасы үлкен қатысушы – 71 жаста болса, ең кішісі – 8 жастағы бүлдіршіндер. Сонымен қоса, финишке жеткен барлық марафоншылар медальдармен марапатталды. Жарыстың ашылу салтанатында Шымкент қаласының дене шынықтыру және спорт басқармасының басшысы міндетін уақытша атқарушысы Ермек Дәрменов бұл марафонның маңыздылығына кеңінен тоқтала өтіп, қатысушыларға сәттілік тіледі. Айта кетейік, марафоншылар Наурыз алаңынан бастап, 15 шақырымдық қашықтықты еңсеріп, Ипподром маңында мәреге жетті. Іс-шараның басты мақсаты – тұрғындарды салауатты өмір салтына баулу және бұқаралық спортты дамыту.