Жамбыл облысында ауылдықтар ансамбльмен ауыз су мәселесін көтерді. Бұл ансамбльдің ерекшелігі - қолдарындағы аспаптарында. Бос шелек пен бос ыдыстан дыбыс шығарған тұрғындар бірнеше мәрте миллиондап ақша бөлінгенмен ауыз суға жарымадық деп отыр. Әріптесім Нұрадин Рақай әуезді «ауылдың алты ауыз» концертін тыңдап келді. НҰРАДИН РАҚАЙ, тілші: — Бұл дарсыл-гүрсіл футбол жанкүйерлері емес. Саз әлемінің сардары, өлең сөздің дүлділі Кенен Әзірбаев ауылының тұрғындары. Олар осылайша бос шелек пен бос ыдысты даңғырлатып, су қайда деп дабыл қағып отыр. Кенен туған ауылға өнер қонған. Кезінде Кенен Көкшолақ әнінде «Мені құртқан көкшолақ» десе бүгінгі ұрпақтары ауылды құртқан қай шолақ деп әндетеді. ДУМАН ТОҚТАРОВ, Кенен ауылының тұрғыны: — Жамбыл облысындағы ең үлгілі ауыл деп тұр ғой. Сонда ең үлгілі ауылда су жоқ. Бәрі фляк, шелекпен тасиды да жүреді. Үш жыл бұрын салды мына құбырды. Онда су жоқ. Кенен ауылына ауыз су тартуға түрлі мемлекеттік бағдарламамен бірнеше рет ақша бөлініп құбыр тартылған. Бірақ тасталған құбырдан тамшы су тамбады дейді тұрғындар. Алайда әкімдіктің есебінде сумен қамтылған ауыл болып саналады. Тіпті былтыр облыстағы ең «Үлгілі ауыл» номинациясын жеңіп алған. Бұл атақты қалай, қай бетімен берген дейді ел. АҚЖОЛТАЙ БЕКТҰРСЫНОВА, Кенен ауылының тұрғыны: — Ылғи осы ауылға ақша бөлініп жатыр. Сол ақша қайда кетіп жатыр? Кім оны тексеріп жатыр? Кім реттеп жатыр? Қашанғы халық сусыз отырады? Қай бетімен Үлгілі ауыл дейміз? Аудан басшылары да тіршілік нәріне деп нақ Кенен ауылына 3-4 мәрте қаржы бөлгенін жасырмайды. Бірақ 500 түтін тұратын елге қанша су қажет екенін ескермепті. БЕКЗАТ БОЛАТБЕКОВ, Қордай ауданының әкімі: — Есімде болса, осы күнге дейін Кенен ауылында жер асты сулары зерттелмеген. Зерттелмей бірталай ұңғымалар жасалған. Скважина бурить етіліп. 2012 ма 2013 жылы ма болған. Енді суды ауылға көтеру тоқ мәселесі бар. Халыққа ол қымбат болғандықтан ол жоба жабылған. 21 жылы ауыл ішіндегі су жүйесі жасалған. Сонымен қосымша қаражат қарастырылып Кенен ауылының ішінен скважина бурить етіліп су қоймасы салынған. 50 кубтық. Бірақ жер асты суы тартылып судың мөлшері жоқ. Дегенмен ауылға ауыз су жетпей жатып аудан басшылары Кененді суы бар ауыл ретінде есепке енгізген. Әр жылдары мемлекеттік бағдарламамен басталған жоба жарым жолда қалып отырған. БЕКЗАТ БОЛАТБЕКОВ, Қордай ауданының әкімі: — Халық ауыз суды Кененнің жоғары жағындағы Сулы сайдың бұлағынан ішіп отыр. 3,5 шақырым жерде. Енді жоба бойынша жаңа технология шығып жатыр ауылдың басына 1000 кубтық тоспа саламыз. Биыл бітеді ол. Мұндай жауаптың мыңын естіген ел, енді дәм ауыз тимей дәмеленбейміз дейді. Аудан әкімі айтқанын орындамаса ауыл ансамблі репертуарын көбейтуді көздеп отыр. Бізді әлеуметтік желіде оқыңыздар: Информбюро 31 / @informburo31kanal Informburo kz / @informburokz2022 Facebook - / informburo31 Instagram - / informburo31 Vkontakte -
https://vk.com/informburo31 TikTok - www.tiktok.com/@informburo31 Біздің сайт: www.31.kz және www.informburo.kz Біздің WhatsApp +7 777 331 31 31 #News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
