Шымкент мұнай өңдеу зауыты өзінің мерейтойын атап өтуде

Шымкент мұнай өңдеу зауыты өзінің мерейтойын атап өтуде. Кәсіпорынның мерейтойына оның тарихы мен алдағы даму жоспарларына арналған бірқатар салтанатты іс-шаралар өткізілді. Толығырақ әріптесім айтып берсін. «ПетроҚазақстан Ойл Продактс» серіктестігі 40 жылдығын атап өтуде. Орталық зауытішілік аллеяда «ЛК-6У – зауыттың жүрегі» мемориалдық ескерткіші ашылды. Бұл кәсіпорынның тарихы басталған ЛК-6У қондырғысын бейнелейтін мұнай тамшысы түріндегі биіктігі екі метрлік композиция. Зауыттың 150-ден астам ардагері мен қазіргі қызметкерлері мемлекеттік және салалық марапаттарға ие болды. СҰЛТАНҒАЗЫ ЖАРҚЫНБЕКОВ, зауыттың ардагері: Біздің зауыттың дамығанына, жетілдірілгеніне, зауыттың жаңғыртылуынан өткеніне, тазарту құрылғыларына қайта құрастыру жүргізілгеніне, қоршаған ортаға шығарындылардың азайғанына өте қуаныштымын. ЖҰМАБЕК АДЫРБЕКОВ , «ПЕТРОҚАЗАҚСТАН ОЙЛ ПРОДАКТС» ЖШС Тауар-шикізат цехы бастығының орынбасары: Мен зауытқа 24 жасымда келдім. Бұрын қарапайым қондырғылар болған, бірақ осы жылдар ішінде кәсіпорын жаңғыртудан өтті. Бүгінгі таңда зауытта 20-ға жуық заманауи технологиялық қондырғылар жұмыс істейді. Жасанды интеллект негізінде цифрлық жүйелер мен шешімдер белсенді енгізілуде. 40 жылдыққа орай зауыт тарихындағы алғашқы мұражай ашылды. Әлеуметтік бастамалар да мерейтойға орайластырылды, Бадам-1 тұрғын алабының тұрғындары үшін жабық спорт кешені ашылды. БАҚЫТ ЕРЕГЕНОВ, «ПЕТРОҚАЗАҚСТАН ОЙЛ ПРОДАКТ» ЖШС вице-президенті: 40 жыл - бұл жай ғана дата емес, бүкіл тарих. Барлығымызға жаңа табыстар мен жетістіктер тілеймін. Бізде үлкен жоспарлар бар: 2030 жылға қарай біз мұнай өңдеу көлемін жылына 6 миллион тоннадан 12 миллион тоннаға дейін ұлғайтуды көздеп отырмыз. Төрт онжылдық жұмыс барысында Шымкент мұнай өңдеу зауыты 180 миллион тоннадан астам мұнай өңдеді. Бүгінде кәсіпорын жоғары көрсеткіштерді көрсетіп отыр. Өңдеу тереңдігі 88 пайызға дейін ұлғайтылды. Ал жеңіл мұнай өнімдерінің шығуы 82 пайызға жетті. #Информбюро #31арна #БастыЖаңалықтар #Новости #31канал