Екі күннен бері ереуілдеткен Жаңаөзендегі мұнайшылар "Кезби" компаниясы кеңсесінің алдына түнеп шықты. Жалақының аздығы жанына батқан жұмысшылар, осылайша басшылықтың назарын аударғысы келген. Қолдарына плакат ұстап, он екі талапты жеткізбек болған жұмысшылардың мәселесімен танысуға бұл жолы облыс әкімі Серікбай Трұмов келді. Айтқанымыз орындалмайынша жұмысқа кіріспейміз деген мұнайшылар енді аштық жарияламақ. Ереуілшілердің талаптарын әріптесім Махаббат Нұржанқызы тыңдаған еді. МАХАББАТ НҰРЖАНҚЫЗЫ, тілші: – Жаңаөзенде кешелі бері ереуілдетіп жатқан "Кезби" компаниясының мыңға жуық жұмысшысы дәл осы жерде түнеп шыққан. Қолдарына "Кезби" компаниясына әділдік орнасын, "Бірдей жұмысқа бірдей еңбекақы", "заңсыз жұмыстан босатылғандар өз орындарына қайта қабылдансын", "Еңбек еркіндігі сақталсын" деп жазылған плакаттарды алып шыққандар осымен екінші күн жұмыстарын тоқтатты. Аптап ыстыққа қарамастан бүгін де наразылықтарын жалғастырған азаматтар басшылыққа бірден 12 талап қойып отыр. Бастылары - жалақыны көтеру, сыйақы төлеу жүйесін қайта қарастыру, зиянды аймақтағы жұмыс үшін ақы төлеу, құрал-саймандарды стандартқа сай ету. АХМЕТ ЖАҚСЫБАЕВ, жұмысшы: – Елмен қатар айлық алғымыз келеді ғой бәріміз де. Алатын 200 мың теңге. Оны кімге жеткізесің? Істеп жатқан жұмыстарымыз, солардан көп жасаймыз НГДУ-дан. Ұңғымаларды жөндейтін жұмысшылар "Кезби" компаниясының басшылығы артық істелген жұмыстың ақысын төлемей, шеберлерге жұмыс уақытын мәжбүрлі түрде азайтып жаздыртады дейді. Мұнай өндірісіне тікелей қызмет етіп жүргендер жұмысқа берілген техникалар адам өміріне қауіпті екенін де айтады. Басшылар "Құл сияқты жұмсайды" деп ызаланған бір топ адам мұндай қорлыққа енді шыдамаймыз дейді. БАҚЫТЖАН БАЙЖАНОВ, шебер: – Айына 660 сағат бар ғой біздер одан артық орындап тұрған соң балдарға еңбекақысын алып бергіміз келеді. Себебі біз балдарға жұмыс жасатқанда айтамыз сендерге айлығын төлетеміз деп. Ал біз мекеменің басшыларына айтсақ, бұлар төлемейді.15 сағат КТУ қояды 740 сағатқа. Бұл деген сұмдық қой. Дәл қазір осында мәселені шешу үшін облыс әкімі Серікбай Трұмов та келді. Жағдайды өз көзіммен көруге келдім деген аймақ басшысы бұл жұмыс беруші мен жұмысшы арасындағы жағдай екенін айтады. СЕРІКБАЙ ТРҰМОВ, Маңғыстау облысының әкімі: – Жекеменшік мекеме болғаннан кейін біз ішкі экономикалық жағдайына араласа алмаймыз. Мәселені екі жақты келіскеннен кейін жұмысшыларға айтады, хабарлайды. Мәселе әрине, экономикалық жағдай, бәрі ақша-қаражатқа тіреледі. Барлығымызға ортақ заң бар. Сондықтан барлығы заңның аясында болу керек деп есептеймін. Ал мыңға жуық азамат бас көтеріп, талаптарын жаудырып тұрғанда "Кезби" компаниясынан сұхбат беруге ешкім шықпады. Тіпті күзетшіге түсірілім тобын кіргізбеуге тапсырма беріп қойыпты. "Кезби" компаниясының бас директоры Бітім Кезбаевқа телефон арқылы хабарластық. Ол мәселенің барлығы тапсырыс беруші тараптан екенін айтып отыр. Десе де қызметкерлердің ереуілге шығуы заңсыздық деп отыр. БІТІМ КЕЗБАЕВ, «КЕЗБИ» ЖШС Бас директоры: – Ол жөнінде біз хат жаздық әкімге де, бәріне. ҚазМұнайгазга да жаздық. Енді біз не істейміз. Олар ертең-ертеңмен отыр. Уақытында жауап беріп жатқан жоқ. ӨзенМұнайгаз аз төлеп отырғанда тендермен келді ғой. Жыл сайын айлық азаяды деген азаматтар ауыр жұмысқа 200 мың теңге жалақы алу ең үлкен қорлық деп есептейді. Ал дәл қазір олар әкімдікке аштық жариялайтындары туралы хабар жіберіп жатыр. Махаббат Нұржанқызы Бізді әлеуметтік желіде оқыңыздар: Youtube - / @informburo31kanal Facebook - / informburo31 Instagram - / informburo31 Vkontakte -
https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #ӨзенМұнайГаз #жұмысшылар_наразылығы #Кезби
