Ұлттық құрама сапында Париж Олимпиадасына лицензия жеңіп алған спортшының бірі – еркін күрес шебері Әлішер Ерғали. 97 кг салмақ дәрежесінде сынға түсетін отандасымыз Париж Олимпиадасының жолдамасына жуырда ғана Қырғызстан астанасы Бішкекте өткен күрес түрлерінен лицензиялық іріктеу турнирінде иелік етті. Ол 1999 жылы 12 сәуірде Жамбыл облысында туған. Әлішер күрес үйірмесіне ағасының себеп болуымен келгенін айтады. Сондай-ақ ол күрес түрлерінен қазақтан шыққан тұңғыш Олимпиада чемпионы болғысы келетінін жасырмайды.
