АЙТЫСТЫҢ АҚТАҢГЕРІ АЯЗ АҚЫНДЫ ЕСКЕ АЛУ КЕШІ ӨТТІ

АЙТЫСТЫҢ АҚТАҢГЕРІ АЯЗ АҚЫНДЫ ЕСКЕ АЛУ КЕШІ ӨТТІ Шу аудандық мәдениет үйінде "Орақ тілді Аяз ақын" атанып,Шу даласын жырымен жырлап,термесімен тербеп, еңбегімен мәдениетке өлшеусіз үлес қосқан "Қазақстан Республикасына еңбегі сіңген мәдениет қызметкері", "Құрмет" орденінің иегері, "Шу ауданының Құрметті азаматы", елге танымал ақын, әнші, жыршы-термеші Аяз Бетбаевтың 80 жылдығына арналған еске алу кеші болып өтті. Бұл кешке ақынның жақындары, бауырлары, ұрпағы және әріптестері, шәкірттері арнайы шақырылды. Атаулы кеш басында аудан әкімі Сәкен Арубаев құттықтау сөз сөйледі. Келген аудан тұрғындары Мәдениет үйінің фаесінде орналасқан Аяз ағамыздың өткен өмірінен құрастырылған фото көрмесімен танысты. Шу өңірінде туып-өскен, биік белестерге қанат қаққан ақын Шу аудандық мәдениет үйінде қырық жылдай абыройлы қызмет еткен. Ол осы жылдарда алыстағы малшылар ауылдарында, дала қостарында, егінжай басында болып, ауыл еңбеккерлеріне мәдени қызмет көрсеткен."Айтыстың ақтангері", "Орақ тілді Аяз" атанып, талайдың таңдайын қақтырған, сөз өнерін құрмет тұтқан, қазақ деген қасиеті бөлек халықтың үлкен дарын иесі атанған.Оның музыкалық шығармалары 1975 жылдан бастап радио, теледидар арқылы көпке таныла бастаған. Сол жылдары "Жетісу әуендері" күйлер жинағына толғаулары мен әндері, сазгерлік өнерге жақындығы бар Аяз Бетбаев көптеген өлеңдерге ән жазды. 1996 жылы Қытай Халық Республикасында сазгердің шығармалары жазылған, 6 мың данадан тұратын аудио-таспа шығарылды. Республикалық, облыстық көлемдегі ақындар айтысының жеңімпазы, Мәскеуде өткен екінші Бүкілодақтық халық шығармашылығы фестивалінің лауреаты, "Шу толқындары" кітабының авторы болған Аяз Бетпаев қандай да мадаққа лайық. Аяз Бетпаевтың төкпе жырдың шебері, талғампаз орындаушы болған. Оның орындауындағы ән-жырлар қазақ радиосының, облыстық «Қазақстан - Тараз» телеарнасы мен облыстық радионың «алтын қорында» сақтауда. Бүгінгі сазды бағдарламада ақынның термелері, жырлары айтылды. Атақты Сауытбек ақынның сарқыты атанып, Сүйінбай, Жамбыл, Кенендердің ізін жалғаған жерлесіміздің өнері кейінгі ұрпаққа үлкен мұра екені сөзсіз. Тұтас ғұмырын өнер саласына, ауданның мәдениет саласын дамытуға арнаған ағамызды қалай құрметтесек те жарасады. Аяз Бетбаевтың өнер әлеміндегі мұрасын дәріптеу жұмыстарын одан әрі жалғастырып, есімін ел есінде қалдыруға арналған шаралар алдағы уақытта ерекше қарқын алатын болады.