ҚР халық артисі Роза Әшірбекова (15.04.1938 - 01.08.2022)

Актриса Роза Әшірбекованың қашан көрсең де арқасын тіп-тік ұстап жинақы жүретін болмысы, үні, киім үлгісі, шляпа киюі ерекше еді. Әдетте бізге сахнаның төріндегі жандар алыстан жарқырап тұратын шолпан жұлдыздай көрінеді. Роза апай сол санаттағы актриса еді. Кезінде режиссер Нұрқанат Жақыпбаев қойған "Атау-кередегі" актрисаның монологы тұла бойыңды шымырлатпай қоймайды. Актрисаның бұл ролі оның жеке өміріндегі қасіретпен ұштасады. Ол кезең актрисаның асыл жарынан, ұлы мен қызынан айырылған жылдар болады. Бұл қойылым жастар мен балалар театрының сахнасынан он жыл түскен жоқ. Актрисаның тағы бір ролін, Т. Әбдіктің "Біз үшеу едік" қойылымындағы ойынын үлкен буын әлі күнге дейін тамсана еске алып жүр. Қас-қағым сәттік театр өнерінде жалындаған шақтары өткен ғасырдың еншісінде қалып, сахнадағы қайталанбас бейнелерін тек фото галерея айқындайтын ұрпақтың өнердегі жолын біз тек тарих қойнауынан іздейміз. Міне, енді Чапай Зұлхашев, Райымбек Сейітметов, Тынымбек Пірімжанов, Әмина Өмірзақова, Салима Саттарова сынды өнер алыптарымен сахналас болған Роза апай, Ғ. Мүсірепов театрының анасы Роза Әшірбекова да тарихқа айналып кете беріпті... Жүзінен нұры төгіліп тұратын асыл жанның, театр анасының рухы пейіштің төрінде шалқысын!