ӘЛІБИ КАНИЕВТІҢ "ТАҒДЫР ТАРТУЫ" АТТЫ ШЫҒАРМАШЫЛЫҚ КЕШІ. ҮРЖАР АУДАНЫ. 2024 ЖЫЛ

ӘЛІБИДІҢ ӘН ТАРТУЫ 19 қараша күні Үржар аудандық мәдениет үйінде белгілі әнші, әуесқой сазгер Әліби Қаниевтің "Тағдыр тартуы" атты шығармашылық кеші өтті. Кішкентай кезінен әуелі аудан сахнасында, Тоқтар Серіковпен бірге еліміздің үлкен сахналарында бала үнімен талайды тамсандырған Әліби, бүгінде орда бұзар жасында халқына есеп беріп, тамаша концертімен көрерменін тәнті етті. Кеш иесін Үржар ауданы әкімінің орынбасары Әсет Баймұрзаев құттықтап, аудан әкімінің Алғыс хаты және ауданымыздың "Абырой" төсбелгісімен марапаттады. "Аманат" партиясының Үржар аудандық филиалының төрағасы Роза Жүнісова және арнайы келген құрметті қонақтар ақ тілектерін ақтарды. Концертті Әліби дәстүрлі әнші ретінде Нартайдың әні "Сырнайым» ", халық әні "Бұлбұлым»", "Тарғытай" тобымен бірге С. Сейфуллиннің "Тау ішінде" әндерімен бастады. Бозбала шағынан ән шығаруға әуестенген Әлібидің көптеген туындылары кеште орындалып, оның композиторлық талантына риза болдық . Атап айтсақ, С.Омаштың сөзіне жазылған «Үш өлшем» термесі, «Сағыныш» (сөзі М.Қарт), «Қыз мұңы» (сөзі Е.Жақыпбек), «Сен ғана» (сөзі Ж.Мақаев), «Анаға сағыныш» әні (сөзі Б.Игілік), «Анашым» және «Ақ еркем» әндері (сөзі Р.Ақылбеков), «Сағыныш әні» (сөзі Б.Жақанов), "Үржарым -ақ бесігім" әндерінен (сөзі С.Туғанов) Әлібидің нағыз кешегі сал - серілердің тұяғы екеніне көзіміз жетті. Әріптесіміздің кешіне ҚР Мәдениет саласының үздігі Н.Черубаев, Д.Аймұхамбетова Н.Тұяқбай, Е.Қалиев, А.Мағауиянов, Д.Шаяхметов, Е.Тұрсын, С.Ықыласов, С.Симахин, Д.Баутинов, Е.Фидахметов ат салысты. Әліби Қаниев көп жылдар бойы "Скиф" вокалды - аспаптық ансамблінің құрамында өнер көрсетіп келеді. Бұл өнер ұжымы Әлібидің авторлық әндерін орындап кештің көркін келтірді. Шығармашылық кешке арнайы Семей, Өскемен қалаларынан келген кеш иесінің ақын достары : Семей қаласының "Дариға-ай" жастар театрының көркемдік жетекшісі, актер Ербұлан Қалым, ҚР "Дарын" мемлекеттік жастар сыйлығының лауреаты, Қазақстан Жазушылар Одағының Абай облысы филиалының төрағасы, Абай облысы мәслихатының депутаты, Абай атындағы облыстық кітапханасының директоры Мерей Қарт, Қазақстан Жазушылар одағының мүшесі, ақын Бауыржан Игілік, Мақаншы ауданы әкімінің орынбасары Олжас Соғымбай, Шығыс Қазақстан облысы, Өскемен қаласы Жастар театрының көркемдік жетекшісі Едіге Қайыртай, Семей қаласы "Дариғай" жастар театрының актері Әділжан Серікқалиев, жергілікті ақын Серікбек Туғановтар мәртебесін өсіріп кетті. Арқалы ақындар жүрекжарды жырларын оқып, Әлібидің әндері әуелеген әсерлі кеш жоғары деңгейде өтті. Кешке атсалысқан барлық әріптестерімізге алғысымды білдіремін. Әлібиге шығармашылық шабыт тілеп, алар асуларың биік болсын деп тілеймін.