Көп балалы аналар бүгін "Күміс алқамен" марапатталды. Салтанатты жиын қалалық әкімдікте өтті. Шаһар басшысының орынбасары Айгүл Арынғазиева алты және одан көп баласы бар бес әйелге үкіметтік наградаларды табыс етті. 34 жастағы келіншек Айтолқын Орынбасарованың алты баласы бар. Жетіншісіне аяғы ауыр. Балалардың үлкені 11, кішісі бір жаста. Үлкен отбасы жатақхананың аумағы 18 шаршы метр бөлмесін паналайды. Айтолқын бес жыл бұрын көп баланың анасы ретінде мемлекеттік жалдамалы пәтерге кезек алған. Қазір 230-шы болып тұр. Үкіметтік наградалар сондай-ақ, алты және одан көп бала тәрбиелеген Іңкәр Әбиева, Баллиза Айтжанова, Үміт Бахиева және Гүлайым Өтетілеуоваға берілді. Қазір Ақтөбеде 6 мыңнан астам көп балалы ана бар. Олардың мыңнан көбі "Алтын алқаға" ие. Бір жарым мыңы - "Күміс алқа" иегері. "Батыр аналар" саны - 335.
