Сiдз шусис коми-пермяцкöй кыв вылын КВН, пондöтчис кöда ведущöйезлöн шуткаэзсянь. Этö лунсö кудымкарса видзчисисö важын ни, эд год вылас КВН овлö дзир öтпырись, а том отир коласын эта мероприятиеыс медрадейтана. Ыджыт Коча, Коса, Юсьва, Белоево, Ёгва да Пермь - эттшöм составын командаэз öксисö шутитны коми кыв вылын видзöтiссезкöт да пессьыны öтамöд коласын аскöття аркмöтöм шуткаэзöн. Öтласа удж, крепыт ёртасьöм да коми кыв дынö радейтöм – быдöс этна качествоэс вöлiсö йитöмöсь командаэзлöн выступленнёэзын. Эта мероприятиелöн шöр могöн лоö национальнöй культура зорöтöм, а сiдз жö том йöз коласын мам кывлiсь популярность лэбтöм. Быдöс эта и пырö Коми-Пермяцкöй округлöн делоэз сьöртi министерстволöн уджö. КДЦын öксьöм отир эта рытö пöттöдз сералiсö да шоччисисö, а интрига видзсис сёр рытöдз. Кузь бöрйöм бöрсянь жюри примитiс сэтшöм решенне: медодзза места сетiсö Ёгваись «Ёгвуси» нима командалö, мöдöдз места босьтiс Юсьвинскöй районлöн «Жагöнжык» нима комнада, куимöт вылын лоис Белоево посадiсь «5Д» нима команда.
