Елбасы қонаққа шақырған бала Арал қаласында тұрады

Елбасы қонаққа шақырған бала. Бүгінде қызылордалықтар 7 жастағы Нұрсұлтан Жақсыгелдиевті осылай атайды. Бұл Мемлекет басшысының биылғы Сыр өңіріне сапарында ел есінде қалардай ерекше сәттердің бірі болған еді. Бала Нұрсұлтан Президентпен кездесу мүмкіндігіне қалай ие болды? Оның арманы орындалды ма? Нұрсұлтан Жақсыгелдиев, 2-ші сынып оқушысы: – Президент айтады: «Кім болғың келеді?», – дейді. Президент болғым келеді деп айттым. Нұрсұлтан Жақсыгелдиев бірер ай бұрынғы Елбасымен кездесуін ерекше құлшыныспен әңгімелейді. Болашақ Президент немесе ғарышкер болуды армандайтын 7 жастағы жеткіншек Арал қаласында тұрады. №260 орта мектептің оқушысы. Оқуда озат екен. Сондықтан Елбасымен кездесуге баратын «Нұрсұлтан» есімді дарынды жастардың қатарына ілігіпті. Сол сәтте көптің арасынан суырылып шыққан ол Мемлекет басшысына арман, тілегін жеткізіп үлгерген. Еңселі елорданы көрсем деген бала арманы Елбасын бейжәй қалдырған жоқ. Президент аттасын Астанаға қонаққа шақырды. Әсем қаланы тамашалауға бала Нұрсұлтан отбасымен бірге барды. Нұрсұлтан Жақсыгелдиев, 2-ші сынып оқушысы: – Астанада мен Бәйтеректі көрдім. Бәйтеректің ішіне бардым. Сосын қолымды қойдым. Сосын менің туған қалам да Астанадай үлкен болса деп тіледім. Мен Астанаға отбасыммен бардым. Нұрсұлтан атаның отыратын жерін, сосын ойын-сауық думанына бардым. Арманы биік аралдық өрен – қарапайым отбасындағы екі баланың үлкені. Ізінен қарындасы Жанерке өсіп келеді. Әкесі – құрылысшы, анасы мектепте жұмыс істейді. Ал өзі білімге құштар. Есепке жүйрік екен. Ұстаздары математика пәнінен олимпиадаға қатыстыруды көздеп отыр. Айтуған Сауяев, Арал қалалық №260 мектеп директоры: – Жаратылыстану пәнін жақсы көрем деп айтады өзінен сұрағанда. Ең алғаш сұрағанмын «дүниетану пәнін жақсы көремін» дейді. Сосын құрылысқа көзін зер салып қарайды. Мысалы, Астанадағы үйлер, керемет ғимараттар соның барлығын өзінің ойында жүргендей, арманында жүргендей, сондай ғаимараттарды көргеніне өзі де дән риза болып келді. Нұрсұлтанның атын әжесі ырымдап қойған екен. «Ер жеткесін еліне еңбек етсін» деп. Болар баланың болмысы бүгіннен байқалып тұр. Бетін қақпай, белін буса, биіктерді бағындырары сөзсіз. Авторлары: Нұрлан Жақыпбеков, Әлхайдар Тұрлыханов